AQŞ prezidentı Donald Tramptyŋ ūldary Qazaqstandaǧy volfram ken oryndaryn igeru jobasyna qatysatyn üleske ie boldy. Būl turaly öz derekközderıne sılteme jasap Financial Times gazetı jazdy, dep habarlaidy “Adyrna”.
Derekközderge süiensek, Tramptyŋ ūldary ötken jyly Skyline Builders qūrylys kompaniiasynyŋ ülesın satyp alǧan. Bıraq olar mūny tıkelei emes, Dominari Securities LLC investisiialyq-konsaltingtık firmasymen bailanysty qūrylym arqyly jüzege asyrǧan.
Odan keiın Skyline Aziiadaǧy maŋyzdy mineraldyq aktivterı bar kompaniianyŋ 20% ülesın 20 million dollarǧa satyp aluǧa şeşım qabyldaǧan. Basylymnyŋ jazuynşa, būl Cove Capital investisiialyq tobynyŋ enşıles kompaniiasy.
Gazetke säikes, Cove Capital men «Qazaqstannyŋ ūlttyq tau-ken kompaniiasy» volframnyŋ ırı, barlanǧan, bıraq älı igerılmegen ken ornyn damytu jönınde kelısım jasaǧan. Keiın Cove Capital qūrylymdary Skyline-men bırıguge kelısken. Nätijesınde Kaz Resources atty jaŋa kompaniia qūrylyp, ol Nasdaq birjasyna şyǧuǧa daiyndalyp jatyr.
30 säuırde Kaz Resources kompaniiasynyŋ resmi saitynda baspasöz-relizı jariialanyp, Skyline Builders Group Holding Ltd pen Cove Kaz Capital Group LLC bırıgu turaly kelısımge kelgenı rastaldy.
Bırıkken kompaniia AQŞ-qa volfram, sirek jer elementterı jäne basqa da maŋyzdy mineraldardy jetkızedı.
Press-relizde Skyline kompaniiasy osy mämıle arqyly «AQŞ üşın negızgı strategiialyq mineral jetkızuşıge ainalu» maqsatyn oryndaityny aitylǧan. Sonymen qatar Kaz Resources tek volfram ǧana emes, litii, berillii, tantal, niobii jäne rubidii siiaqty elementterdı de jetkızuge daiyn ekenı körsetılgen.
Sondai-aq bırıgu mämılesıne Qazaqstanda 15 lisenziiasy bar KAZ Critical Minerals atty taǧy bır amerikalyq kompaniia da qatysady.
Press-relizge säikes, mämılenıŋ negızı – Tau-Ken Samūryq kompaniiasynan «Soltüstık Qatpar» JŞS-nıŋ 70% ülesın satyp alu.
Būl kompaniia Qaraǧandy oblysyndaǧy ekı ken ornyna lisenziia iesı:
- «Soltüstık Qatpar»
- «Joǧarǧy Qairaqty»
«Tau-Ken Samūryq» mälımetınşe, Soltüstık Qatpar qory ortaşa, al Joǧarǧy Qairaqty — bıregei, älemdegı eŋ ırı üş volfram ken ornynyŋ bırı (qory 1 million tonnadan asady).
21 säuırde «Tau-Ken Samūryq» būl mämıle turaly mälımdeme jasap, ken oryndary satylmaitynyn atap öttı. Sonymen qatar Cove Capital bırlesken käsıporyndaǧy jarǧylyq kapitaldyŋ 70% ülesın alatyny rastaldy.
Kelısım boiynşa:
- investor 1 milliard dollardan astam qarjy salady;
- tehnikalyq jäne operasiialyq täuekelderdı öz moinyna alady.
Kompaniia Qazaqstan strategiialyq baqylaudy saqtaitynyn erekşe atap öttı.
Sonymen qatar joba önımdı Qazaqstan aumaǧynda öndıruge baǧyttalǧan, qosylǧan qūn qalyptastyruǧa, jaŋa jūmys oryndaryn aşuǧa, salyq tüsımderın arttyruǧa mümkındık beredı.
Habarlamada halyqaralyq serıktes volfram önımderıne tūraqty naryq aşatyny da aitylǧan.
Sarapşylar sirek jer elementterın «jaŋa mūnai» dep ataidy, sebebı olar qazırgı tehnologiialyq ekonomika üşın asa maŋyzdy.
Olar elektronikada jäne qorǧanys önerkäsıbınde keŋ qoldanylady.
Qazırgı taŋda būl salada Qytai köş bastap tūr. Bloomberg sarapşylarynyŋ aituynşa, Qytai sirek metaldardy AQŞ-pen sauda qaqtyǧysynda qysym qūraly retınde qoldanady.
Mysaly, ötken jyly Tramp engızgen baj salyǧyna jauap retınde Qytai sirek jer elementterınıŋ eksportyna şekteuler engızgen.
Sondyqtan AQŞ būl resurstarǧa balama jetkızu joldaryn ızdeude.
Eske salsaq, osy jyldyŋ aqpanynda Donald Tramp Qytaiǧa täueldılıktı azaitu üşın qūny 12 milliard dollar bolatyn strategiialyq mineraldar qoryn qūru josparyn jariialaǧan.
