جۋرناليست نۇرگەلدى ابدىعاني قوعامداعى توسىن قۇبىلىستى ءسوز ەتىپ، وقىرمان قاۋىمنىڭ نازارىن اۋداردى. اۆتور تيك-توك الەۋمەتتىك جەلىسىنىڭ تىكەلەي تولقىنىنا ءتۇن جارىمىندا قوسىلىپ، ۇلكەندى-كىشىلىگە، جاستارعا ۇلتتىق داستۇرىمىزگە، ءتالىم-تاربيەمىزگە قارسى ۇگىت ايتاتىن ادامداردىڭ كوبەيگەنىن بايقاعان، دەپ حابارلايدى "ادىرنا" ۇلتتىق پورتالى.
- ءدىن دەگەن وتە نازىك تاقىرىپ قوي. بىرەۋدىڭ كوڭىلىنە، بىرەۋدىڭ سەنىمىنە ءسوز ءتيىپ كەتەدى دەپ تارتىنشاقتايمىز. دەسە دە، بۇگىن قىسقا عانا ءبىر ويدى ورتاعا سالماقپىن. تيك-توك دەگەن جەلى قازىر جۇرت كوپ باس سۇعاتىن الاڭعا اينالدى. جاسى دا، كارىسى دە سوندا. كەشە توقاەۆقا دا ماقتاپ جۇرگەن وسى تيك-توك. ءبىز دە بارمىز سوندا. سوڭعى ۋاقىتتارى قارا جامىلعان قاتىن-قالاشتىڭ تىكەلەي ەفيرلەرى لەنتامدا ءجيى شىعىپ جۇرگەن. ءمان بەرمەدىم. ونداعى كوكي-سوكي قوقىستىڭ بارلىعىن قاراپ، بارلىعىنا ءسوز شىعارىپ، پىكىر جازىپ وتىراتىن ۋاقىت قايدا؟.. - دەپ جازدى جۋرناليست.
كەيىننەن اۆتور تۇمشالانىپ الىپ، قازاقى تاربيەگە، ۇلتتىق سالت-ساناعا قارسى "كەرتولعاۋ" ايتاتىنداردىڭ ءسوزىن، ءىس-ارەكەتىن سارالادى.
- جاڭاعى قارالى قاتىنداردىڭ بىرەۋى ءبىر شىقتى، ەكىنشىسى ەكى شىقتى. سودان الگىندە ەرىنبەي بىرەۋىنىڭ اڭگىمەسىن تىڭداپ شىقتىم. اۋەلى، جاڭاعىلارىڭىز ءسوز شەشەن، ايتارعا اعىلىپ تۇرعان سوزمەرلەر دە ەمەس. ەكى ءسوزدىڭ باسىن قۇراپ سويلەي المايتىن ەجىكتەر. مىڭق-مىڭق ەتىپ، ارنەنى ءبىر اڭگىمە قىلىپ، ساعاتتاپ وتىردى. جارتى ساعاتتان سوڭ، قولىمدى بىراق سىلتەپ، شىعىپ كەتتىم. سوسىن، بۇلار كوبىنە-كوپ تۇنگى ۋاقىتتاردا ەفيرگە شىعادى ەكەن. ءتۇن دەگەندە دە، ەكى، ۇشتەر شاماسىندا. ءتىپتى، بىرەۋىن ءتورتتىڭ شاماسىندا كورىپ قالدىم. ايتاتىن اڭگىمەلەرى ارابي تەرميندەردى قولدانا وتىرىپ، ۇلتتىق تاربيەگە قايشى، قازاقى تانىم-تۇسىنىككە جات اڭگىمەلەر. ونىڭ الدىندا بىرەۋى: "اكە-شەشەڭ ورامالىڭا، نامازىڭا قارسى بولسا، ونىڭ پىكىرىن ەلەمە. قارسى شىق", - دەگەن ماعىنادا بىردەڭەلەردى ايتىپ وتىرعان. ونى سكيرندەپ الماپپىن. مىنالارى دا وڭىپ تۇرعانى شامالى- دەدى بۇعان قاتىستى.
ءCوز سوڭىندا نۇرگەلدى ابدىعاني كوڭىلىندەگى كوپ سۇراقتى وقىرمان قاۋىمعا جەتكىزدى. قولدانۋشىلار اشىق، بۇكپەسىز، ءوز ىڭعايى مەن شاما-شارقىنا، ءبىلىم مەن تۇسىنىك دەڭگەيىنە قاراي كونتەنت جاريالايتىن تيك-توك جەلىسىندەگى توسىن قۇبىلىسقا توقتاۋ بولۋى قاجەتتىگىن قاداپ ايتتى.
"مەندەگى سۇراق: وسىلاردى بىرەۋ-مىرەۋ باقىلاپ، ايتقاندارىن اڭدىپ قاراپ، نە ىستەپ، نە قويىپ جۇرگەندەرىن تەكسەرىپ جاتىر ما؟ ۇلتتىق قاۋىپسىزدىككە جاۋاپتىلار اينالىسۋى ءتيىس شارۋا عوي! بۇلاردىڭ ەفيرلەرىنە كونتەنت-اناليز جاساۋ كەرەك! ولاردىڭ تۇنگى ۋاقىتتاردا وياناتىنىن دا قاپەرگە الۋ كەرەك؟ نەگە ول ۋاقىتتار؟ قىسقاسى قازىر جەلىلەردە تۇنگى ۋاقىتتاردى قارا كيىمدى قاتىندار (بالكىم قىزدار شىعار) جاۋلاپ جاتىر", - دەپ ويىن تۇيىندەدى ول.
"ادىرنا" ۇلتتىق پورتالى
