رەسەي پرەزيدەنتى ۆلاديمير پۋتين مەن فرانتسيا پرەزيدەنتى ەممانۋەل ماكرون ءۇش جىلدان كەيىن العاش رەت تەلەفون ارقىلى سويلەستى، دەپ حابارلايدى "ادىرنا" ۇلتتىق پورتالى.
كرەملدىڭ مالىمەتىنشە، ەكى ەل باسشىلارى سوڭعى رەت 2022 جىلدىڭ قىركۇيەگىندە سويلەسكەن.
تەلەفون ارقىلى بولعان اڭگىمەدە پۋتين مەن ماكرون تاياۋ شىعىستاعى شيەلەنىس ماسەلەسىن كوتەرگەن.
يران مەن يزرايل اراسىنداعى قاقتىعىس پەن اقش-تىڭ يراننىڭ يادرولىق نىساندارىنا جاساعان سوققىلارىن تالقىلادى. كوشباسشىلار بۇۇ قاۋىپسىزدىك كەڭەسىنىڭ تۇراقتى مۇشەلەرى رەتىندە ايماقتا بەيبىتشىلىك پەن تۇراقتىلىقتى قامتاماسىز ەتۋدەگى ءوز ەلدەرىنىڭ جاۋاپكەرشىلىگىن اتاپ ءوتتى.
سونداي-اق، ۋكراينا توڭىرەگىندەگى جاعداي دا ءسوز بولدى. ۆلاديمير پۋتين باتىس ەلدەرىن رەسەيدىڭ قاۋىپسىزدىك مۇددەلەرىن ەلەمەدى دەپ ايىپتاپ، كيەۆكە قولداۋ كورسەتىپ وتىرعانىن اتاپ ءوتتى. ونىڭ ايتۋىنشا، قاقتىعىستىڭ تۇپكى سەبەبى جويىلعان جاعدايدا جانە “جاڭا تەرريتوريالىق شىندىق” ەسكەرىلگەن كەزدە رەسەي كەلىسسوزدەرگە دايىن.
كرەمل اڭگىمە سىندارلى سيپاتتا وتكەنىن مالىمدەدى. ەكى تاراپ بولاشاقتا دا بايلانىستا بولىپ، ءوزارا پوزيتسيالاردى ۇيلەستىرۋ مۇمكىندىگىن قاراستىرۋعا كەلىستى. فرانتسۋز باق-تارى دا ماكروننىڭ پۋتينمەن ديالوگتى جالعاستىرۋ نيەتى بار ەكەنىن حابارلادى.
