پولشا سىرتقى ىستەر مينيسترلىگى رەسەي ەلشىلىگىنە ەلدىڭ شىعىسىنداعى ليۋبلين ۆوەۆودستۆوسىندا درون قۇلاۋىنا بايلانىستى نارازىلىق نوتاسىن جولدادى. بۇل تۋرالى 21 تامىز كۇنى وتكەن بريفينگتە مينيسترلىك وكىلى پاۆەل ۆرونسكي مالىمدەدى، دەپ حابارلايدى “ادىرنا”.
«سىرتقى ىستەر مينيسترلىگىنىڭ پىكىرىنشە، بۇل وقيعا رەسەي فەدەراتسياسىنا كەز كەلگەن بەيبىت ۇدەرىستە نەمەسە حالىقارالىق قاۋىمداستىق اياسىنداعى ارەكەتتە سەنىمدى ارىپتەس رەتىندە سەنىم ارتۋعا بولمايتىنىن كورسەتەدى. ءبىز بۇل ارەكەتتى ادەيى جاسالعان ارانداتۋشىلىق، گيبريدتى سوعىستىڭ ءبىر بولىگى جانە پولشا رەسپۋبليكاسىنا قارسى تاعى ءبىر دۇشپاندىق اكت رەتىندە باعالايمىز»، دەپ ءتۇسىندىردى ۆارشاۆاداعى مينيسترلىك.
اسكەري درون 20 تامىزعا قاراعان ءتۇنى پولشا شىعىسىنداعى جۇگەرى القابىنا قۇلاپ، جارىلعان. 21 تامىزدا ليۋبلين ۆوەۆودستۆوسىنىڭ پروكۋرورى گجەگوج ترۋسەۆيچ جۋرناليستەر الدىندا سويلەگەن سوزىندە بۇل ۇشقىشسىز اپپاراتتىڭ، ۇلكەن ىقتيمالدىقپەن، بەلارۋس جاعىنان كەلگەنىن مالىمدەدى.
درون بەلارۋس شەكاراسىنان 100 كم، ۋكراينا شەكاراسىنان 120 كم قاشىقتىقتا ورنالاسقان وسينى اۋىلىنىڭ ماڭىندا قۇلاعان. وقيعا ورنىنان تۇسىرىلگەن كادرلاردا جارىقتىڭ جارق ەتكەنى مەن ارتىنان قاتتى جارىلىستىڭ بولعانى كورىنەدى. جارىلىس تولقىنى جاقىن ماڭداعى ۇيلەردىڭ تەرەزەلەرىن سىندىرعان، زارداپ شەككەندەر جوق. وقيعا ورنىنان كۇيىپ كەتكەن مەتالل جانە پلاستيك بولشەكتەر تابىلعان.
