قازاقستاننىڭ دالاسىن جاياۋ ارالاپ شىققان 72 جاستاعى جيھانگەز سارسەنباي قوتىراشەۆ ءوز ساپارىن اياقتادى. اقساقال ناۋرىز ايىندا جولعا شىعىپ، 8 مىڭ شاقىرىمعا جۋىق جولدى جاياۋ ءجۇرىپ وتكەن، دەپ حابارلايدى "ادىرنا" ۇلتتىق پورتالى.
سارسەنباي اقساقالدىڭ ءساتتى ساپارى ۇلىتاۋ توپىراعىنان باستالىپتى. ءجۇرىس-تۇرىسى شيراق، تىڭ قاريانى ەلوردا اۋەجايىندا ءبىر توپ كىسى كۇتىپ الىپ، قۇرمەت كورسەتتى.
"جاياۋ ءجۇرىپ وتكەن جول ساپارىمدى اقتاۋدا اياقتادىم. ەلىمىزدىڭ بارلىق وڭىرىندە بولدىم. جوسپار ورىندالدى. دىتتەگەن ماقساتىما جەتتىك. ماقساتىم — قازاقستانىمدى جاياۋ ارالاپ شىعۋ ەدى. ەندى تۇتاس دۇنيەگە ساپار شەكسەم بە دەپ وتىرمىن. كەلەر جىلى جازدا جولعا اتتانامىن", - دەدى اقساقال.
"اسىڭ باردا ەر تانى بەرىپ ءجۇرىپ، اتىڭ باردا جەر تانى جەلىپ ءجۇرىپ" دەگەن بابالار ءسوزىن عۇمىرلىق مۇراتىنا اينالدىرعان مارافونشى اقساقال كەلەشەكتە ءازىربايجان، الدىڭعى ازيا مەن ەۋروپاعا تابان تىرەپ، ءارى اقش، قىتاي، موڭعوليانى جاياۋ كەزۋدى جوسپارلاپ وتىر.
سونىمەن قاتار، كوپتى كورگەن قاريا ات شىعارىپ، اتاق قۋ ەش مۇراتى ەمەس، مۇراتى - ەل-جۇرتىن تەگىس تانۋ ەكەندىگىن دە ەرەكشە اتاپ ءوتتى.
"ادىرنا" ۇلتتىق پورتالى
