بۇگىن، 26 ءساۋىر كۇنى جاڭاوزەن قالاسىندا ماڭعىستاۋ وبلىسى مەن شىمكەنت قالاسىنىڭ ونەرپازدارى اراسىندا رەسپۋبليكالىق «بەس اسىل» كوماندالىق ۇلتتىق ونەر سايىسى ءوتتى. مادەني شاراعا ماڭعىستاۋ وبلىسى اكىمىنىڭ ءبىرىنشى ورىنباسارى اسحات ورالوۆ قاتىستى.
اۋقىمدى مادەني ءىس-شارا ايتىس اقىندارى مەن جىرشى-تەرمەشىلەردىڭ حالىقارالىق وداعىنىڭ باستاماسىمەن جانە ماڭعىستاۋ وبلىسى اكىمدىگىنىڭ جانە «AMANAT» پارتياسىنىڭ قولداۋىمەن ۇيىمداستىرىلدى.
سايىس قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ جولداۋلارىندا ايقىندالعان ۇلتتىق قۇندىلىقتاردى دارىپتەۋ، ءداستۇرلى ونەردى دامىتۋ جانە وڭىرارالىق مادەني بايلانىستاردى نىعايتۋ ماقساتىندا وتكىزىلدى.
سايىستىڭ نەگىزگى ماقساتى – ايتىس اقىندارى مەن ءداستۇرلى ونەر وكىلدەرىنىڭ شىعارماشىلىق الەۋەتىن ارتتىرۋ، ولاردىڭ كاسىبي دامۋىنا جاعداي جاساۋ جانە جاستاردى ۇلتتىق ونەرگە باۋلۋ.
بايقاۋ اياسىندا قاتىسۋشىلار سۇرە ايتىس، تۇرە ايتىس، قايىم ايتىس، قىز بەن جىگىت ايتىسى سەكىلدى ءداستۇرلى ايتىس تۇرلەرى بويىنشا ونەر كورسەتتى. سونىمەن قاتار كۇي، جىر، تەرمە جانە ءداستۇرلى ءان جانرلارى قامتىلدى.
كوماندالىق فورماتتا وتكەن سايىسقا ءار وڭىردەن ءبىر جەتەكشى، ءتورت ايتىسكەر اقىن، سونداي-اق تەرمەشى، جىرشى، ءداستۇرلى ءانشى، كۇيشى جانە تانىستىرۋشى قاتىستى. قاتىسۋشىلاردىڭ ونەرى سۋىرىپسالمالىق شەبەرلىگى، مازمۇن تەرەڭدىگى، ۇلتتىق ءداستۇردى ساقتاۋ دەڭگەيى جانە ساحنالىق مادەنيەتى بويىنشا باعالاندى.
ونەرپازداردىڭ ونەرىن مادەنيەت جانە ونەر سالاسىنىڭ تانىمال قايراتكەرلەرىنەن قۇرالعان قازىلار القاسى سارالادى. ولاردىڭ قاتارىندا ايتىس اقىندارى مەن جىرشى-تەرمەشىلەردىڭ حالىقارالىق وداعىنىڭ توراعاسى ءجۇرسىن ەرمان، جىرشى-عالىم بەرىك ءجۇسىپوۆ، اقىن سارين قالقامان، كۇيشى-زەرتتەۋشى مۇرات ابۋعازى، ءانشى سەرىك وسپانوۆ، اقىن-جۋرناليست جاناربەك ءاشىمجانوۆ جانە اقىن، ساراپشى كوپبوسىن ءومىرجان بار. كەشتى اقىن، قر پارلامەنتى ءماجىلىسىنىڭ دەپۋتاتى امانجول ءالتاي جۇرگىزدى.
ءىس-شارا قورىتىندىسى بويىنشا ماڭعىستاۋ وبلىسىنىڭ ايتىسكەرلەرى جەڭىسكە جەتىپ، كەلەسى كەزەڭگە جولداما الدى. ەكى كوماندانىڭ ايتىسكەرلەرى دە ارنايى ديپلومدارمەن، اقشالاي سىيلىقتارمەن جانە ۇيىمداستىرۋشىلار تاعايىنداعان جۇلدەلەرمەن ماراپاتتالدى.
اتالعان جوبا ۇلتتىق ونەردى جاڭعىرتۋعا، جاس تالانتتاردى قولداۋعا جانە وڭىرلەر اراسىنداعى مادەني ىقپالداستىقتى ارتتىرۋعا باعىتتالعان ماڭىزدى باستاما بولىپ سانالادى.
