بيىل 26 ساۋىردە چەرنوبىل اتوم ەلەكتر ستانساسىنداعى دۇلەي اپاتقا 40 جىل تولدى.
1986 جىلعى ءدال وسى كۇنى چەرنوبىل اتوم ەلەكتر ستانتسياسىنىڭ 4-رەاكتورى جارىلىپ، يادرولىق ەنەرگەتيكا تاريحىنداعى ەڭ ءىرى تەحنوگەندىك اپات تىركەلگەن ەدى. اپات سالدارىنان رەاكتور تولىقتاي ءبۇلىنىپ، قورشاعان ورتاعا وراسان كولەمدە راديواكتيۆتى زاتتار تارادى. رادياتسيا بۇلتتارى سول كەزدەگى ۋكراين كسر اۋماعىنان اسىپ، قازىرگى ۋكراينا، بەلارۋس جانە رەسەي جەرلەرىن، سونداي-اق ەۋروپانىڭ بىرقاتار ەلدەرىن قامتىدى.
اپاتتان كەيىن ستانسا ماڭىندا 30 شاقىرىمدىق وقشاۋلاۋ ايماعى قۇرىلىپ، 115 مىڭنان استام ادام قاۋىپسىز جەرگە كوشىرىلدى. شامامەن 5 ميلليون گەكتار اۋىل شارۋاشىلىعى جەرى اينالىمنان شىعارىلدى. رادياتسيالىق لاستانۋ ايماق تۇرعىندارىنىڭ ومىرىنە، دەنساۋلىعىنا جانە ەكولوگياعا ۇزاق مەرزىمدى زيان كەلتىردى.
اپات سالدارىن جويۋعا شامامەن 550 مىڭ ادام جۇمىلدىرىلدى. ولاردىڭ قاتارىندا قازاقستاننان بارعان 30 مىڭعا جۋىق ازامات بار. قازىرگى تاڭدا سولاردىڭ شامامەن 6 مىڭعا جۋىعى عانا ورتامىزدا.
چەرنوبىل تراگەدياسى بەيبىت اتومعا دەگەن سەنىمگە ۇلكەن سوققى بولدى. 1986 جىلدان 2002 جىلعا دەيىن سولتۇستىك امەريكا مەن باتىس ەۋروپا ەلدەرىندە بىردە-ءبىر جاڭا اتوم ەلەكتر ستانتسياسى سالىنباعانى — سونىڭ ايعاعى.
2003 جىلى وتكەن تاۋەلسىز مەملەكەتتەر دوستاستىعى سامميتىندە سول كەزدەگى ۋكراينا پرەزيدەنتى لەونيد كۋچما 26 ءساۋىردى حالىقارالىق رادياتسيالىق اپاتتار قۇرباندارىن ەسكە الۋ كۇنى دەپ جاريالاۋدى ۇسىندى.
چەرنوبىل اپاتى — ادامزات تاريحىنداعى ەڭ اۋىر تەحنوگەندىك قاسىرەتتەردىڭ ءبىرى. ارادا 40 جىل وتسە دە، ونىڭ زاردابى تولىق جويىلعان جوق. بۇل وقيعا يادرولىق قاۋىپسىزدىك ماسەلەسىنىڭ ماڭىزىن الەمگە قايتا ەسكە سالدى.
