فوتو: قتف ءباسپاسوز قىزمەتى
قازاقستاندىق تەننيسشى انسار نيەتقاليەۆ قىتايدىڭ ۋحان قالاسىندا وتكەن J100 تۋرنيرىندە ۇزدىك ناتيجە كورسەتتى، دەپ حابارلايدى "ادىرنا".
انسار نەبارى 15 جاستا بولسا دا، 18 جاسقا دەيىنگىلەر ساناتىندا ونەر كورسەتىپ، جوعارى جاس توبىنداعى تاجىريبەلى قارسىلاستارىمەن تەڭ دارەجەدە ويىن كورسەتتى.
فينالدىق باسەكەدە وتانداسىمىز جارىستىڭ ءبىرىنشى راكەتكاسى، قىتايلىق تسزياحۋ حۋمەن (Jiahu Hu) كەزدەستى. وزىنەن جاسى ۇلكەن قارسىلاسىنا قارسى وتكەن ماتچتا انسار ەكى سەتتە جول بەرىپ، ءتۋرنيردىڭ كۇمىس جۇلدەگەرى اتاندى.
ايتا كەتەيىك، نيەتقاليەۆتىڭ قىتايداعى ساپارى وتە ءساتتى وتۋدە. وسىدان ءبىر اپتا بۇرىن ول گۋانچجوۋدا وتكەن ITF World Tennis Tour Juniors (J60) دوداسىندا جەڭىمپاز اتانعان بولاتىن. 18 جاسقا دەيىنگىلەر اراسىندا كورسەتكەن بۇل ناتيجەسى انساردىڭ الەمدىك رەيتينگتەگى ورنىن ايتارلىقتاي نىعايتا تۇسپەك.
