بۇگىن قارت قاراتاۋدىڭ بوكتەرىندە جامبىل وبلىسى اكىمدىگىنىڭ ۇيىمداستىرۋىمەن «قىزعالداق مۇرا» حالىقارالىق فەستيۆالى ءوتتى، دەپ حابارلايدى aqjolgazet.kz.
تالاس اۋدانىنا قاراستى ەسەيحان اۋىلى ماڭىندا وتكەن اۋقىمدى شارا بيىل ەكىنشى مارتە جوعارى دەڭگەيدە ۇيىمداستىرىلىپ وتىر.
ۇلتتىق قۇندىلىقتاردى ۇلىقتاۋدى، ءوڭىردىڭ تۋريستىك كلاستەرىن دامىتۋدى ماقسات تۇتقان ءىس-شاراعا 3 مىڭعا جۋىق ادام قاتىستى. سونداي-اق حالىقارالىق فەستيۆالگە گوللانديا، قىتاي، تۇركيا، سينگاپۋر، اقش، تاجىكستان، تۇركىمەنستان، وزبەكستان، ۋكراينا، فينليانديا، شۆەيتساريا جانە چەحيا ەلدەرىنەن 38 شەتەلدىك قوناق كەلدى.
ءداستۇر-سالتتى دارىپتەيتىن اشىق اسپان استىندا وتكەن اۋقىمدى فەستيۆالدە 20-دان استام اقشاڭقان كيىز ءۇي تىگىلىپ، مادەني كوپشىلىك، سپورتتىق بۇقارالىق ءىس-شارالار لەگى ۇيىمداستىرىلدى. كونتسەرتتىك باعدارلاماعا سايكەس، الەمدىك شارانىڭ القيسسا «قىزعالداقتىڭ شىعۋ تاريحى» تاقىرىبىنداعى تەاترلاندىرىلعان قويىلىممەن باستالدى. سونداي-اق مەرەكەلىك كەشتە ەسترادا جۇلدىزدارى توقتار سەرىكوۆ، بەيبىت سەيدۋاليەۆا جانە سەرىك يبراگيموۆ، سونداي-اق ك.ازىرباەۆ اتىنداعى جامبىل وبلىستىق فيلارمونياسىنىڭ ارتىستەرى ونەر كورسەتتى.
سونىمەن قاتار فەستيۆال شەڭبەرىندە «اۋىل» حالىقتىق-دەموكراتيالىق پاتريوتتىق پارتياسىنىڭ قولداۋىمەن جانە دەمەۋشىلىگىمەن جۇلدە قورى 5 ميلليون تەڭگەنى قۇرايتىن ۇلتتىق سپورت ويىندارىنىڭ 8 تۇرىنەن جارىس ءوتتى. اتاپ ايتقاندا، اۋدارىسپاق، قازاق كۇرەسى، قوشقار كوتەرۋ، قول كۇرەسى، ءداستۇرلى ساداق اتۋ، ارقان تارتۋ، اسىق اتۋ ۇيىمداستىرىلدى.
ال حالىقارالىق فەستيۆالدىڭ كوركىن قىزدىرعان نەگىزگى ءىس-شارا – «ۇزدىك بيە ساۋىنشى» سايىسى. قازاقتىڭ كەنجە قالعان «قىمىزمۇرىندىق» ءداستۇرىن جاڭعىرتۋدى كوزدەگەن اتالعان سايىسقا دا دەمەۋشىلەر تاراپىنان 1 ميلليون تەڭگە جۇلدە قورى قاراستىرىلدى. ءتىپتى ءاربىر قاتىسۋشىنى ىنتالاندىرۋ ماقساتىندا 50 مىڭ تەڭگەدەن قارجىلاي سىياقى تابىستالدى.
فەستيۆالدىڭ قورىتىندى ساتىندە ءسوز العان جامبىل وبلىسى اكىمى ەربول قاراشوكەەۆ فەستيۆالدىڭ ءمان-ماڭىزىنا كەڭىرەك توقتالدى.
– تابيعات پەن مادەنيەت توعىسقان كيەلى مەكەندە «قىزعالداق مۇرا» حالىقارالىق تۋريستىك فەستيۆالى ەكىنشى رەت ۇيىمداستىرىلىپ وتىر. بۇل – حالقىمىزدىڭ جۇرەگىندە ساقتالعان ماڭگىلىك مۇرامىزدىڭ جارقىن كورىنىسى. كۇن نۇرىنا شومىلعان قىزعالداقتار القابى – تابيعاتتىڭ سۇلۋ كوركى عانا ەمەس، دالا وركەنيەتىنىڭ ءۇنسىز شەجىرەسى، ۇلتتىق رۋحتىڭ ءتىرى كۋاسى. وسى يگى باستاما ارقىلى تابيعات پەن ءداستۇردى ناسيحاتتاي وتىرىپ، كەلەشەك ۇرپاققا امانات بولار اسىل قۇندىلىقتاردى ۇلىقتادىق. فەستيۆال اياسىندا عاسىرلاردان سىر شەرتەتىن «قىمىزمۇرىندىق» ءداستۇرىن جانە ۇلتتىق سپورت سايىستارىن تاماشالادىق. قولونەرشىلەردىڭ تۋىندىلارى حالقىمىزدىڭ شەبەرلىگى مەن ونەرگە دەگەن سۇيىسپەنشىلىگىن پاش ەتتى، – دەدى ايماق باسشىسى.
ءىس-شارانىڭ تۇزدىعى سول، فەستيۆال اياسىندا جامبىل وبلىسىنا سوناۋ نيدەرلاندىدان جەتكىزىلگەن 40 مىڭ قىزعالداق تۇقىمىنىڭ سەرتيفيكاتى سالتاناتتى تۇردە تابىستالدى. كارى قۇرلىقتان كەلگەن شەتەلدىك مەيمان ءىس-شاراعا قاتىستى ءوز اسەرلەرىمەن ءبولىسىپ، گوللانديالىق قىزعالداق تۇقىمداسىنىڭ شىعۋ تاريحىنا از-كەم توقتالدى.
ايتا كەتەرلىگى، فەستيۆال وتە جوعارى دەڭگەيدە ۇيىمداستىرىلعان. ادام قاراسى كوپ بولسا دا قىمقۋىت قاربالاس جوق. وبلىس ورتالىعىنان فەستيۆال وتەتىن اۋماققا دەيىن ارنايى مارشرۋت تۇزىلگەن. كەلۋشىلەرگە ارنالعان تەگىن تاسىمالداۋ جولعا قويىلعان. ول ءۇشىن جولاۋشىلارعا ارنالعان 30 اۆتوبۋس، 45 جول تالعامايتىن كولىك قاراستىرىلعان. ءتىپتى قاۋىپسىزدىك ماسەلەسى دە نازاردان تىس قالماعان. فەستيۆال اۋماعىندا جانە قىزعالداق القابىندا قوعامدىق ءتارتىپ پەن قاۋىپسىزدىكتى قامتاماسىز ەتۋ ءۇشىن 40 پاترۋلدىك اۆتوكولىك، 4 ءورت ءسوندىرۋ تەحنيكاسى جانە 4 جەدەل جاردەم بريگاداسى جۇمىلدىرىلعان. سونداي-اق فەستيۆال اۋماعىندا 30 ەكولوگيالىق سانيتارلىق توراپ ورناتىلدى.
ايتا كەتەيىك، الەم بويىنشا قىزعالداقتىڭ 34 ءتۇرى تىركەلگەن بولسا، ونىڭ 11 ءتۇرى جامبىل وبلىسىندا كەزدەسەدى. ال «قىزىل كىتاپقا» ەنگەن قىزعالداقتى جۇلعانى، زاقىمداعانى جانە وسكەن ورتاسىن بۇلدىرگەنى ءۇشىن 12,9 ميلليون تەڭگەگە دەيىن ايىپپۇل نەمەسە وزگە دە قىلمىستىق جاۋاپكەرشىلىك قاراستىرىلعان.
