جامبىل وبلىسىندا العاش رەت«مەركى مەملەكەتتىك وڭىرلىك تابيعي پاركى» اشىلدى، دەپ حابارلايدى “ادىرنا” ۇلتتىق پورتالى قازاقپاراتقا سىلتەپ.
اكىمدىكتىڭ مالىمەتىنشە، بۇل پارك — ەرەكشە قورعالاتىن تابيعي اۋماق مارتەبەسىنە يە.
اتالمىش جوبا بىرىككەن ۇلتتار ۇيىمىنىڭ دامۋ باعدارلاماسىنىڭ قولداۋىمەن جۇزەگە اسىرىلعان.
جاڭا تابيعي پاركتىڭ اۋماعى 86 632 گەكتاردى قۇرايدى. ول تاۋلى جانە تاۋ بوكتەرىندەگى اۋماقتاردى قامتىپ، وسىمدىكتەر مەن جانۋارلاردىڭ سيرەك كەزدەسەتىن تۇرلەرىن قورعاۋعا باعىتتالعان.
ەرەكشە ايماقتا قازاقستاننىڭ قىزىل كىتابىنا ەنگەن قار بارىسى، ارقار، ءۇندى جايراسى، قىزىل قاسقىر جانە تۇركىستان سىلەۋسىنى مەكەندەيدى. سوڭعى ساناق بويىنشا پارك اۋماعىندا 8 قار بارىسى، 120 ارقار، 20 ءۇندى جايراسى جانە 22 سىلەۋسىن تىركەلگەن.
جاڭا پارك تابيعاتتى قورعاۋمەن قاتار، عىلىمي-زەرتتەۋ جۇمىستارىن جۇرگىزۋگە، ەكولوگيالىق اعارتۋشىلىقتى كۇشەيتۋگە جانە ەكوتۋريزمدى دامىتۋعا مۇمكىندىك بەرمەك. تۋريستەر ءۇشىن تاۋعا شىعۋ، جاياۋ جانە اتپەن سەرۋەندەۋ، قۇستاردى باقىلاۋ سياقتى باعىتتار قاراستىرىلعان.
تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ حابارلاۋىنشا، الداعى ۋاقىتتا پارك اۋماعىندا تۋريستىك سوقپاقتار، تانىمدىق باعىتتار مەن دەمالىس ايماقتارى كەزەڭ-كەزەڭىمەن جاساقتالىپ، تابيعاتتى قورعاۋ تالاپتارى قاتاڭ ساقتالاتىن بولادى.
ايتا كەتەيىك، وتكەن جىلى قازاقستانداعى ۇلتتىق پاركتەرگە 2,8 ميلليوننان استام ادام بارعان. بۇل كورسەتكىش 2023 جىلمەن سالىستىرعاندا 18%-عا جوعارى.
