جامبىل وبلىسىندا مەملەكەت باسشىسىنىڭ جولداۋىندا بەلگىلەنگەن مىندەتتەردى ءتۇسىندىرۋ ماقساتىندا اقپاراتتىق توپ مۇشەلەرى تاراز قالاسى، بايزاق جانە جامبىل اۋداندارىندا بىرقاتار كەزدەسۋلەر وتكىزدى.
كەزدەسۋلەرگە جەرگىلىكتى تۇرعىندار، جاستار، اگروونەركاسىپ كەشەنى مەن ءبىلىم سالاسىنىڭ وكىلدەرى، ەتنومادەني بىرلەستىكتەردىڭ جەتەكشىلەرى جانە ەڭبەك ۇجىمدارى قاتىستى.
اقپاراتتىق توپ ەكى باعىت بويىنشا جۇمىس ىستەدى. ونىڭ قۇرامىندا قۇرىلتاي دەپۋتاتى ءابىلحايىر تامابەك، قازاقستان حالىق كەڭەسىنىڭ مۇشەسى ۋاليحان بولاتبەك، سالالىق ۆيتسە-مينيسترلەر جانە ۇلتتىق ەكونوميكا مينيسترلىگىنىڭ ارنايى باعدارلامالار كوميتەتىنىڭ توراعاسى بولدى.
كەزدەسۋلەر بارىسىندا جولداۋدىڭ نەگىزگى باسىمدىقتارى ءتۇسىندىرىلىپ، ءوڭىردىڭ وزەكتى ماسەلەلەرى تالقىلاندى. اتاپ ايتقاندا، اۋىل شارۋاشىلىعىن دامىتۋ، سۋ رەسۋرستارىن ءتيىمدى پايدالانۋ، يرريگاتسيالىق جۇيەلەردى جاڭعىرتۋ، ءوندىرىستى وركەندەتۋ، شارۋالاردى قولداۋ جانە اۋىلدىق جەرلەردەگى كاسىپكەرلىكتى دامىتۋ ماسەلەلەرىنە باسىمدىق بەرىلدى. سونىمەن قاتار تۇرعىندار الەۋمەتتىك جانە ينفراقۇرىلىمدىق ماسەلەلەر بويىنشا ءوز ۇسىنىس-پىكىرلەرىن ورتاعا سالدى.
اگروونەركاسىپ كەشەنى وكىلدەرىمەن كەزدەسۋدە قۇرىلتاي دەپۋتاتى ءابىلحايىر تامابەك جامبىل وبلىسى ءۇشىن سۋ رەسۋرستارىن ءتيىمدى پايدالانۋ ماسەلەسىنىڭ ماڭىزدىلىعىنا توقتالدى. ونىڭ ايتۋىنشا، وڭىردە حالىق پەن شارۋاشىلىق نىساندارىنىڭ ەداۋىر بولىگى جەر استى سۋىن پايدالانادى. الايدا سۋ قورى شەكسىز ەمەس. سوندىقتان ونى ۇتىمدى پايدالانۋ مەن ساقتاۋ – بۇگىنگى كۇننىڭ ماڭىزدى مىندەتتەرىنىڭ ءبىرى ەكەنىن اتاپ ءوتتى.
دەپۋتات مەملەكەت باسشىسىنىڭ جولداۋىندا سۋ رەسۋرستارىنىڭ ۇلتتىق اقپاراتتىق جۇيەسىن قۇرۋ جۇمىستارىن جەدەل اياقتاۋ تاپسىرىلعانىن اتاپ ءوتتى. بۇل جۇيە سۋ كولەمىن ناقتى ەسەپكە الۋعا، ونى ءتيىمدى باسقارۋعا جانە سۋ تاراتۋ جەلىلەرىندەگى شىعىنداردى ازايتۋعا مۇمكىندىك بەرەدى.
جالپى، كەزدەسۋلەر اشىق پىكىر الماسۋ فورماتىندا ءوتىپ، تۇرعىندار وزدەرىن تولعاندىرعان سۇراقتارىن قويىپ، ۇسىنىستارىن جەتكىزدى. اقپاراتتىق توپ مۇشەلەرى جولداۋدا بەلگىلەنگەن مىندەتتەردى جۇزەگە اسىرۋ ناقتى ناتيجەلەرگە باعىتتالۋى كەرەكتىگىن اتاپ ءوتتى. سونداي-اق ءوڭىردىڭ دامۋىنا قاتىستى ماسەلەلەردى شەشۋدە مەملەكەتتىك ورگاندار مەن قوعام اراسىنداعى ءوزارا بايلانىستىڭ ماڭىزدىلىعىنا نازار اۋداردى.
