ۇلىتاۋ وبلىسىندا پرەزيدەنت باستاماسىمەن جۇزەگە اسىرىلىپ جاتقان «تازا قازاقستان» ەكولوگيالىق باعدارلاماسى اياسىندا اۋقىمدى ەكولوگيالىق ءىس-شارا ۇيىمداستىرىلدى.
ءىس-شارا مەملەكەت باسشىسى قاسىم-جومارت توقاەۆتىڭ قاتىسۋىمەن وتكەن رەسپۋبليكالىق تەلەكوپىرمەن ۇشتاستى.
اتالعان تەلەكوپىرگە ۇلىتاۋ وبلىسىنىڭ اكىمى داستان رىسپەكوۆ جەزقازعان قالاسىنىڭ ورتالىعىنان تىكەلەي قوسىلىپ، قازاقستان حالقى اسسامبلەياسىنىڭ وڭىرلىك فيليالى وكىلدەرىمەن، جاستارمەن، مەملەكەتتىك قىزمەتكەرلەرمەن، ۆولونتەرلارمەن، كاسىپورىن قىزمەتكەرلەرىمەن جانە قوعام بەلسەندىلەرىمەن بىرگە قاتىستى.
تىكەلەي ەفير بارىسىندا مەملەكەت باسشىسى بۇل باستامانىڭ ۇرپاق الدىنداعى ماڭىزى زور ەكەنىن اتاپ ءوتتى.
پرەزيدەنت ءوز سوزىندە:
«تازا قازاقستان»، «زاڭ جانە ءتارتىپ»، «ادال ازامات» قاعيداتتارى ءبىرتۇتاس قۇندىلىقتار جۇيەسىن قۇرايدى جانە قوعامدىق ومىردە بەرىك ورنىعۋى ءتيىس. بۇل باستامالاردى كەڭىنەن ناسيحاتتاۋعا تانىمال ءارى بەدەلدى ازاماتتاردى بەلسەندى تارتۋ قاجەت. ال وسى يدەيانىڭ نەگىزگى قوزعاۋشى كۇشى – جاستار. ەكولوگيالىق مادەنيەتتى ەرتە جاستان قالىپتاستىرۋ اسا ماڭىزدى. «تازا قازاقستان» حالىقتىڭ ءومىر ساپاسى مەن ءال-اۋقاتىن ارتتىرۋعا باعىتتالعان ۇلتتىق يدەياعا اينالۋى ءتيىس»، – دەپ اتاپ ءوتتى.
تەلەكوپىر اياقتالعاننان كەيىن قاتىسۋشىلار اعاش وتىرعىزۋ جۇمىستارىنا كىرىستى. اكتسيا اياسىندا جەزقازعان قالاسىنداعى ساياباققا 275 ءتۇپ، ال جوشى حان تاريحي-مادەني كەشەنىنىڭ اۋماعىنا 510 ءتۇپ جاس كوشەت وتىرعىزىلدى. جالپى وبلىس بويىنشا ءبىر كۇندە 1550 ءتۇپ جاسىل جەلەك ەگىلدى.
ايتا كەتۋ كەرەك، ۇلىتاۋ وبلىسىندا ەلدى مەكەندەردى كوگالداندىرۋ، اۋماقتاردى اباتتاندىرۋ جانە ەكولوگيالىق مادەنيەتتى قالىپتاستىرۋ باعىتىنداعى جۇمىستار جۇيەلى تۇردە جالعاسىپ كەلەدى. جىل باسىنان بەرى 7 سەنبىلىك وتكىزىلىپ 20 مىڭنان استام ادام، 1551 ۇجىم جانە 416 تەحنيكا جۇمىلدىرىلىپ، 2749,9 توننا قوقىس شىعارىلدى. سونىمەن قاتار 700,7 گەكتار اۋماق تازارتىلىپ، 10 894 ءتۇپ اعاش وتىرعىزىلدى.
