"بوستاندىق اۋدانىندا، ساناتوري الماتى كوشەسىندە اناما – 66 جاستاعى زەينەتكەر ايەلگە بەلگىسىز جاس جىگىت شابۋىل جاسادى. ول ايالدامادا اۆتوبۋس كۇتىپ تۇرعان. جىگىت ارتىنان كەلىپ، ەش سەبەپسىز اياۋسىز ۇرا باستاعان. اينالادا ادام ازايعان ءساتتى كۇتكەن. قازىر انام اۋرۋحانادا. جاعدايى وتە اۋىر. بۇل ۆيدەونى كورۋ قيىن. بىراق ونى كورۋ كەرەك. مەن مۇنى قارالىم ءۇشىن جاريالاپ وتىرعان جوقپىن. بۇل تۋرالى بارىنشا كوپ ادام بىلگەنىن قالايمىن", – دەپ جازدى جابىرلەنۋشىنىڭ قىزى Threads جەلىسىندە.
ول كۇدىكتىنىڭ زاڭ بويىنشا قاتاڭ جازالانۋىن تالاپ ەتۋدە.
الماتى قالالىق پوليتسيا دەپارتامەنتى مالىمەتىنشە، اتالعان دەرەك بويىنشا بوستاندىق اۋدانىنىڭ پوليتسيا باسقارماسى قىلمىستىق ءىس قوزعاعان.
"قىلمىس جەدەل تۇردە اشىلدى. جەدەل-ىزدەستىرۋ شارالارى ناتيجەسىندە كۇدىكتىنىڭ جەكە باسى انىقتالىپ، ۇستالدى جانە ۋاقىتشا ۇستاۋ يزولياتورىنا قامالدى. قازىرگى ۋاقىتتا وقيعانى جان-جاقتى جانە وبەكتيۆتى تەرگەۋگە باعىتتالعان كەشەندى تەرگەۋ ارەكەتتەرى جۇرگىزىلۋدە. جازانىڭ بۇلتارتپاستىعى – ىشكى ىستەر ورگاندارى جۇمىسىنىڭ نەگىزگى قاعيداتى. زورلىق-زومبىلىقپەن بايلانىستى كەز كەلگەن قۇقىقبۇزۋشىلىق توقتاتىلىپ، كىنالىلەر تولىق جاۋاپكەرشىلىككە تارتىلادى", – دەلىنگەن حابارلامادا.سونىمەن قاتار، جۋرناليست ميحايل كوزاچكوۆ ءوزىنىڭ Telegram-ارناسىندا كۇدىكتىنىڭ بۇرىن ادام ءولتىرۋ جانە دەنساۋلىققا اۋىر زيان كەلتىرۋ فاكتىلەرى بويىنشا سوتتالعان 25 جاستاعى ەر ادام ەكەنىن جازعان. سول كەزدە سوت ونىڭ ءوز ءۇيى مەن وتباسىن قورعاعانىن ەسكەرىپ، قاجەتتى قورعانىس شەگىنەن اسىپ كىسى ءولتىرۋ جانە دەنساۋلىققا قاساقانا اۋىر زيان كەلتىرۋ بويىنشا 2 جىلعا باس بوستاندىعىنان ايىرعان.
بۇعان دەيىن الماتىداعى تۇرعىن ءۇي كەشەندەرىنىڭ بىرىندە ەر ادامنىڭ قولىنا پىشاق ۇستاپ، ءوتىپ بارا جاتقان ادامداردى قۋعانى تۋرالى دا حابارلانعان.
