الماتى وبلىسىندا قارت ايەلدى تۇنشىقتىرىپ، توناپ كەتكەن ەر ادامدار ۇستالدى. بۇل تۋرالى polisia.kz مالىمدەدى، دەپ حابارلايدى “ادىرنا” ۇلتتىق پورتالى.
«ەڭبەكشىقازاق اۋدانىنىڭ پوليتسياسىنا 81 جاستاعى جەرگىلىكتى تۇرعىن ارىزداندى. ول ءوز ارىزىندا مەديتسينالىق بەتپەردە كيگەن ەكى بەيتانىس جىگىتتىڭ ءۇيىنىڭ اۋلاسىنا كىرىپ، ونى قىلعىندىرىپ، ۇيالى تەلەفون مەن قولما-قول اقشاسىن ۇرلاپ كەتكەنىن بايانداعان.
28 قاڭتار كۇنى جەدەل ىزدەستىرۋ كەزىندە 1978 جانە 1989 جىلى تۋعان الماتىنىڭ ەكى تۇرعىنى ۇستالدى. ولار ءوز قىلمىسىن تولىعىمەن مويىنداعان»، دەلىنگەن حابارلامادا.
پوليتسيا قىزمەتكەرلەرى ءىستىڭ ءمان-جايىن تولىق، جان-جاقتى جانە وبەكتيۆتى تەرگەۋدى قامتاماسىز ەتۋ ءۇشىن ساراپتاما تاعايىندادى. تەرگەۋ ءجۇرىپ جاتىر.
ۇستالعانداردىڭ وسىعان ۇقساس وزگە قىلمىستارعا قاتىسى بار-جوعى تەكسەرىلۋدە.
