تۇركىستاندا 16 جاستاعى تۋىسىن زورلاعان 71 جاستاعى تۇرعىن سوتتالدى. ءىستى وبلىستىق قىلمىستىق ىستەر جونىندەگى اۋدانارالىق سوتى قارادى، دەپ حابارلايدى «ادىرنا» ءتىلشىسى.
«كامەلەت جاسىنا تولماعان بالانى زورلاپ، ۇيىنە ۇرلانىپ كىردى» دەگەن ايىپ تاعىلعان كەلەس اۋىلىنىڭ تۇرعىنى 15 جىل 6 ايعا سوتتالدى. جازا مەرزىمى 17 جىلعا دەيىن بەرىلۋى كەرەك ەدى. سوت سوتتالۋشىنىڭ جاسى مەن دەنساۋلىعىن ەسكەرىپ، 15 جىل 6 اي باس بوستاندىعىنان ايىردى، – دەپ ءتۇسىندىردى سوت توراعاسى داۋرەن ماداليەۆ.
سونداي-اق ەر ادامعا ءومىر بويىنا پەداگوگيكالىق قىزمەتپەن اينالىسۋعا جانە كامەلەتكە تولماعاندارمەن جۇمىس ىستەۋگە تىيىم سالىندى.
سوتتا انىقتالعانداي، ايىپتالۋشى مەن جابىرلەنۋشى كورشى تۇرعان. قىزدىڭ اناسى استاناعا جۇمىس بابىمەن كەتكەن، ال اكەسى زيراتتا قاراۋىل بولىپ ىستەگەن. ايىپتالۋشى وسى ءساتتى پايدالانىپ، قىزدى زورلاعان. زاڭسىز ارەكەتتەر ءۇش كۇنگە سوزىلعان. سونىڭ سالدارىنان قىز جۇكتى بولىپ قالعان.
ەسكە سالايىق، بۇل وقيعا تۋرالى 2025 جىلدىڭ قازان ايىندا بەلگىلى بولدى. العاشىندا تۇركىستان وبلىسىنىڭ كەلەس اۋدانىنداعى اۋىلداردىڭ بىرىندە 15 جاستاعى قىزدىڭ 71 جاستاعى كورشىسىنەن بوسانعانى تۋرالى اقپارات تاراعان.
كەيىن بالا قۇقىقتارى جونىندەگى ۋاكىل دينارا زاكيەۆا كەيبىر جايتتى ناقتىلادى. ونىڭ ايتۋىنشا، قىز قاڭتار ايىندا استانادا بوسانعان، ال اناسىنىڭ ارىزى تەك قازان ايىندا تۇسكەن.
وڭىرلىك پوليتسيانىڭ مالىمەتىنشە، بوسانعاننان كەيىن قىز بەن اناسى جىنىستىق قاتىناس ءوزارا كەلىسىممەن بولعانىن ايتىپ، ارىز جازۋدان جانە ساراپتاما جاساۋدان باس تارتقان. وسىعان بايلانىستى كەلەس اۋدانى پوليتسياسى ماتەريالداردى نومەنكلاتۋرالىق ەسەپكە العان. الايدا 12 قازاندا اناسى 71 جاستاعى تۋىسىنا قاتىستى رەسمي ارىز تۇسىرگەن.
