الماتىدا زەينەتكەر الاياقتاردىڭ قۇربانى بولىپ، قوماقتى قاراجاتىنان ايىرىلعاننان كەيىن قايتىس بولدى، دەپ حابارلايدى "ادىرنا”.
مارقۇمنىڭ تۋىستارىنىڭ ايتۋىنشا، ول 21 ناۋرىزدا تاڭەرتەڭ بازارعا بارعان جانە سول جەردە الاياقتاردىڭ ارباۋىنا ءتۇسۋى مۇمكىن. تۋىستارىنىڭ بولجامىنشا، بەلگىسىز ادامدار ونى قالا ىشىندە ءتۇرلى بانكوماتتارعا اپارىپ جۇرگەن. سونىڭ سالدارىنان قاريا سەگىز ادامنىڭ ەسەپشوتىنا شامامەن 4 ميلليون تەڭگە اۋدارعان.
قايتىس بولعان كىسىنىڭ نەمەرەسى ءوز ۇندەۋىندە اتاسىنىڭ قوڭىراۋلارعا جاۋاپ بەرمەگەنىن، الايدا كەزەكتى قوڭىراۋعا بەيتانىس ەر ادام جاۋاپ بەرىپ، كەيىن تەلەفوندى اتاسىنا بەرگەنىن ايتتى. ونىڭ سوزىنشە، ارعى جاقتان بوگدە داۋىستار ەستىلگەن.
سوڭعى سويلەسۋ كەزىندە زەينەتكەر ايالداماعا قاراي بارا جاتقانىن ايتىپ، الاياقتارعا تاپ بولعانىن راستاعان. سول ساتتە ونىڭ جاعدايى كۇرت ناشارلاپ، كوشەدە قۇلاپ قالعان. كۋاگەرلەر العاشقى كومەك كورسەتىپ، جەدەل جاردەم شاقىرعانىمەن، ەر ادام دارىگەرلەر كەلگەنگە دەيىن كوز جۇمدى.
الماتى قالالىق پوليتسيا دەپارتامەنتى بۇل دەرەك بويىنشا قىلمىستىق ءىس قوزعالعانىن حابارلادى.
"قازىر كۇدىكتىلەردىڭ جەكە باسىن انىقتاۋعا جانە ولاردى ۇستاۋعا باعىتتالعان جەدەل-ىزدەستىرۋ جانە تەرگەۋ شارالارىنىڭ كەشەنى جۇرگىزىلىپ جاتىر", - دەلىنگەن الماتى پوليتسياسىنىڭ حابارلاماسىندا.
قىز اتاسىنا كومەكتەسۋگە تىرىسقان بارلىق ادامعا العىسىن ايتىپ، وسى وقيعاعا قاتىستى قانداي دا ءبىر مالىمەت كورگەن نەمەسە بىلەتىن جانداردان حابار بەرۋىن سۇرادى.
