Astanadaǧy Prezidenttık ortalyqta QR Mädeniet jäne aqparat ministrlıgınıŋ ūiymdastyruymen «Ūlttyq kıtap» respublikalyq baiqauy jeŋımpazdaryn marapattau räsımı öttı. Is-şara Memleket basşysy Qasym-Jomart Toqaevtyŋ bastamasymen bekıtılgen Ūlttyq kıtap künı aiasynda ūiymdastyryldy.
Saltanatty jiyn Qazaqstan Respublikasy Prezidentınıŋ ışkı saiasat mäselelerı jäne kommunikasiialar jönındegı kömekşısı Arman Qyryqbaevtyŋ qūttyqtau sözımen aşyldy.
«Memleket basşysy ärdaiym qoǧamda kıtap oqu mädenietın damytuǧa erekşe män beredı. 2024 jyly Ūlttyq qūryltaidyŋ üşınşı otyrysynda Prezident «Kıtap oqityn ūlt» tūjyrymdamasyn ūsynǧan edı. Atalǧan tūjyrymdama negızınde byltyrdan bastap 23 säuır Ūlttyq kıtap künı bolyp belgılendı», – dedı Arman Qyryqbaev.
Sondai-aq, Prezident kömekşısı aldaǧy ekı aptada Memleket basşysy kıtap oqu mädenietın keŋınen nasihattauǧa jäne ziiatker ūlt qalyptastyruǧa baǧyttalǧan arnaiy Jarlyqqa qol qoiatynyn jetkızdı.
Is-şaraǧa Parlament deputattary, belgılı aqyn-jazuşylar, memleket jäne qoǧam qairatkerlerı, sondai-aq kıtaphana basşylary qatysty.
«Ūlttyq kıtap» respublikalyq baiqauy otandyq avtorlardy qoldauǧa, baspa ısın damytuǧa jäne qazaq ädebietınıŋ, ruhaniiatynyŋ damuyna baǧyttalǧan. Biyl baiqauǧa 32 baspadan 155 ötınım tüstı. Qatysuşylar soŋǧy ekı jylda jaryq körgen otandyq avtorlardyŋ şyǧarmalaryn ūsyndy.
Jeŋımpazdar toǧyz nominasiia boiynşa anyqtaldy. Olardyŋ qatarynda «Balalarǧa arnalǧan üzdık kıtap», «Üzdık komiks», «Non-fikşn baǧytyndaǧy üzdık kıtap», «Detektiv janryndaǧy üzdık kıtap», «Satira janryndaǧy üzdık kıtap», «Üzdık illiustrasiialyq kıtap», «Üzdık audarma kıtap», «Fantastika janryndaǧy üzdık kıtap» jäne «Üzdık baspa» bar. Sonymen qatar «Jyl kıtaby» atalymy boiynşa jeŋımpaz esımı belgılı boldy. Būl marapat Abai Qūnanbaiūlynyŋ qara sözderı negızınde jazylǧan «Ūrpaqqa ösiet» kıtaby üşın Gülmira Amandyqovaǧa tabystaldy. Barlyq jeŋımpazǧa aqşalai syilyqtar berıldı.
«Ūlttyq kıtap» baiqauy otandyq qalamgerler men baspagerlerdıŋ eŋbegın därıpteitın maŋyzdy alaŋ retınde qalyptasyp, kıtap oqu mädenietın nyǧaituǧa jäne qoǧamnyŋ qazaq ädebietıne degen qyzyǧuşylyǧyn arttyruǧa yqpal etıp keledı.
Saltanatty räsım aiasynda elımızdıŋ tükpır-tükpırınen kelgen kıtaphanaşylar men baspa salasynyŋ ökılderı «Mädeniet salasynyŋ üzdıgı» tösbelgısımen jäne «Qūrmet» gramotasymen marapattaldy.
Ūlttyq kıtap künıne arnalǧan kıtap aptalyǧy aiasynda bügın el kölemınde soŋǧy kün «Kıtap – dostyq ambassadory» atauymen öttı. Būl kün otandyq ädebiettı şetel oqyrmany arasynda nasihattauǧa baǧyttaldy.
Kıtap aptalyǧynyŋ soŋǧy künınde respublika boiynşa kıtaphanalarda, mädeniet jäne bılım beru ūiymdarynda şyǧarmalary şet tılderge audarylǧan qazaqstandyq avtorlardyŋ, sondai-aq käsıbi audarmaşylar men baspagerlerdıŋ qatysuymen kezdesuler ūiymdastyryldy.
Atap aitqanda, Astanada IX «Astana Eurasian Book Fair – 2026» halyqaralyq kıtap körme-järmeŋkesı aiasynda kıtap tanystyrylymdary ötıp, Halyq jazuşysy, aqyn Mūhtar Şahanovtyŋ şyǧarmaşylyǧyna arnalǧan «Ǧasyrdyŋ ǧalamat aqyny» körmesı ūsynyldy. Almaty qalasynda «Älemdı bırıktırgen – Qazaq kıtaby» atty ädebi kvest ötkızılıp, Berdıbek Soqpaqbaevtyŋ «Menıŋ atym Qoja» povesınıŋ şet tılderdegı audarmalary tanystyryldy. Sondai-aq «Qazaq ädebietı – älem tılderınde» atty kıtap körmesı ūiymdastyryldy.
Jalpy, kıtap aptalyǧy aiasynda el kölemınde ötken ıs-şaralarǧa 200 myŋǧa juyq adam qatysty.
Aita keteiık, erteŋ, 23 säuır künı Qazaqstanda Memleket basşysynyŋ bastamasymen bekıtılgen Ūlttyq kıtap künı atap ötıledı. Atauly kün halyqtyŋ kıtap oquǧa degen qyzyǧuşylyǧyn arttyruǧa, oqu mädenietın jaŋǧyrtuǧa jäne ziiatkerlık äleuettı damytuǧa baǧyttalǧan.
