مەملەكەت باسشىسى قاسىم-جومارت توقاەۆ تۋريزم جانە سپورت ءمينيسترى ەربول مىرزابوسىنوۆتى قابىلدادى. بۇل تۋرالى اقوردا جاريالادى، دەپ حابارلايدى “ادىرنا” ۇلتتىق پورتالى.
پرەزيدەنت قاسىم-جومارت توقاەۆقا وتاندىق سپورت سالاسىن كەشەندى رەفورمالاۋ جونىندە بۇعان دەيىن بەرىلگەن تاپسىرمالارىنىڭ ورىندالۋ بارىسى باياندالدى.
مەملەكەت باسشىسىنا بالالار مەن جاسوسپىرىمدەر سپورتىن دامىتۋ، تورەشىلەر مەن ماماندار بىلىكتىلىگىن ارتتىرۋ، لەگيونەر سانىن ازايتۋ، فەدەراتسيالار جۇمىسىن وڭتايلاندىرۋ باعىتىندا اتقارىلعان جۇمىستار تۋرالى ەسەپ بەرىلدى.
ەربول مىرزابوسىنوۆتىڭ ايتۋىنشا، سالاعا ۆەرتيكالدى باسقارۋ جۇيەسىن ەنگىزۋ شارالارى باستالدى. وسى ماقساتتا مينيسترلىك جانىنان ارنايى قۇرىلعان توپ مۇشەلەرى وڭىرلەردەگى سپورت سالاسىنىڭ جاعدايىنا جان-جاقتى تالداۋ جۇرگىزدى. بۇدان بولەك، قولدانىستاعى "دەنە شىنىقتىرۋ جانە سپورت تۋرالى" زاڭعا نەگىزگى باسىمدىقتاردى ايقىندايتىن وزگەرىستەر مەن تولىقتىرۋلار ەنگىزۋ ءۇشىن جۇمىس توبى قۇرىلدى. حالىقارالىق فەدەراتسيالارمەن ىنتىماقتاستىق اياسىن كەڭەيتۋ، سپورت ينفراقۇرىلىمدارىن جەتىلدىرۋ ءۇشىن جۇيەلى جۇمىس جۇرگىزىلىپ جاتىر.
سونىمەن قاتار مەملەكەت باسشىسىنا ەلىمىزدىڭ تۋريستىك الەۋەتىن ارتتىرۋ شارالارى تۋرالى مالىمەت بەرىلدى. مىسالى، شەتەلدىك ساياحاتشىلارعا ءتۇرلى مۇمكىندىكتەر ۇسىناتىن Neo Nomad Visa جوباسى ىسكە قوسىلدى.
پرەزيدەنت تاپسىرماسىنا سايكەس، الماتى تاۋ كلاستەرىن، ماڭعىستاۋ جانە بۋراباي كۋرورتى ايماقتارىندا جاعاجاي ءتۋريزمىن دامىتۋ جونىندە كەشەندى جوسپار ازىرلەنۋدە. ويىن بيزنەسىن جانە لوتەرەيانى رەتتەۋ كوميتەتى قۇرىلىپ، لۋدومانياعا قارسى كۇرەس قولعا الىندى.
كەزدەسۋ سوڭىندا قاسىم-جومارت توقاەۆ مينيسترگە سپورت جانە تۋريزم سالالارىن ودان ءارى جەتىلدىرۋ جونىندە بىرقاتار ناقتى مىندەت جۇكتەدى. اتاپ ايتقاندا، الداعى ۋاقىتتا وتەتىن حالىقارالىق سپورت دودالارىنا دايىندىق دەڭگەيىن پىسىقتاۋدى، سونداي-اق ەلىمىزدە تانىمالدىعى ارتىپ كەلە جاتقان پادەل سپورتىن ىلگەرىلەتۋگە نازار اۋدارۋدى تاپسىردى.
