سوڭعى 10 كۇندە ەلوردادا ءبىر ايلىق نورمادان ارتىق قار جاۋدى، دەپ حابارلايدى قالا اكىمدىگىنىڭ رەسمي سايتى. قىسقى ماۋسىم باستالعالى بەرى كوممۋنالدىق قىزمەتتەر كۇشەيتىلگەن تاۋلىك بويعى رەجيمدە ەڭبەك ەتىپ جاتىر.
قار تازالاۋ جانە ارنايى پوليگوندارعا شىعارۋ جۇمىستارى قالانىڭ بارلىق التى اۋدانىندا ۇزدىكسىز جۇرگىزىلۋدە. اۋا تەمپەراتۋراسىنىڭ كۇندىز جىلىنىپ، تۇندە كۇرت تومەندەۋىنە بايلانىستى قالا كوشەلەرى مەن تروتۋارلاردا كوكتايعاق پايدا بولۋدا.
تۇرعىنداردىڭ قاۋىپسىزدىگىن قامتاماسىز ەتۋ ماقساتىندا جولدار مەن جاياۋ جۇرگىنشىلەر ايماقتارىنا تەحنيكالىق تۇز سەبىلۋدە. قىس باستالعالى بەرى كوكتايعاققا قارسى 3 مىڭ توننادان استام ماتەريال قولدانىلىپ، 176 مىڭ تەكشە مەتردەن استام قار شىعارىلعان. بۇل كورسەتكىش — شامامەن 14 مىڭ اۋىر جۇك كولىگىنىڭ رەيسىنە تەڭ.
اكىمدىك مالىمەتىنشە، بارلىق جۇمىس تاۋلىك بويى جالعاسىپ جاتىر. سونىمەن قاتار، اۋلالار مەن كىرەبەرىستەردى قار مەن مۇزدان تازالاۋ — پيك پەن ميب ۇيىمدارىنىڭ تىكەلەي مىندەتى. ولار تۇرعىنداردىڭ قاۋىپسىزدىگى مەن جايلىلىعى ءۇشىن اۋلالاردى دەر كەزىندە تازالاپ وتىرۋى ءتيىس.
استانا اكىمدىگى قالا تۇرعىندارى مەن قوناقتارىن اۋا رايىنىڭ قولايسىز كەزىندە ساقتىق شارالارىن ۇستانۋعا، كوكتايعاقتا اباي بولۋعا جانە قاجەتسىز الىس ساپارلارعا شىقپاۋعا شاقىردى.
