مەملەكەت باسشىسى قاسىم-جومارت توقاەۆ ءباا پرەزيدەنتى شەيح حاليفا بەن زايد ءال ناحاياننىڭ قايتىس بولۋىنا بايلانىستى وسى ەلدىڭ جاڭادان سايلانعان پرەزيدەنتى شەيح مۇحاممەد بەن زايد ءال ناحايانعا جانە بيلەۋشى اۋلەتتىڭ مۇشەلەرى مەن امىرلىكتەر حالقىنا كوڭىل ايتۋ ءۇشىن بىرىككەن اراب امىرلىكتەرىنە باردى. بۇل تۋرالى اقوردانىڭ رەسمي سايتى مالىمدەدى، دەپ حابارلايدى “ادىرنا” ۇلتتىق پورتالى.
كوشباسشىلاردىڭ كەزدەسۋى ابۋ دابيدەگى قاسرۋ-ل مۋشريف پرەزيدەنت سارايىندا ءوتتى.
مەملەكەت باسشىسى قازاقستان حالقىنىڭ جانە جەكە ءوزىنىڭ اتىنان كوڭىل ايتىپ، شەيح حاليفانىڭ ەلدى وركەندەتۋ جولىنداعى ەرەن ەڭبەگىن اتاپ ءوتتى.
“امىرلىكتەردىڭ ەل ىشىندەگى جانە حالىقارالىق دەڭگەيدەگى كوپتەگەن جەتىستىگى شەيح حاليفانىڭ ەسىمىمەن بايلانىستى. ونىڭ دانا باسشىلىعىمەن ءباا تاياۋ شىعىستاعى بەيبىتشىلىك پەن تۇراقتىلىقتىڭ كۇشتى جاقتاۋشىسى بولدى، سونىمەن قاتار بۇكىل اراب الەمى ءۇشىن قارقىندى ەكونوميكالىق ءوسۋ مەن الەۋمەتتىك دامۋدىڭ ۇلگىسى بولدى. سوندىقتان ءبىز ونىڭ قايتىس بولۋىن ءباا ءۇشىن عانا ەمەس، بۇكىل الەم قوعامداستىعى ءۇشىن وراسان زور قايعى دەپ قابىلدايمىز”، – دەدى قاسىم-جومارت توقاەۆ.
قاسىم-جومارت توقاەۆ شەيح حاليفا بەن زايد ءال ناحاياننىڭ قازاقستان مەن امىرلىكتەر اراسىنداعى قاتىناستاردى دامىتۋعا ەلەۋلى ۇلەس قوسقانىن اتاپ ءوتتى.
كەزدەسۋ بارىسىندا قاسىم-جومارت توقاەۆ شەيح مۇحاممەد بەن زايد ءال ناحاياندى ءباا پرەزيدەنتى بولىپ سايلانۋىمەن قۇتتىقتاپ، ونىڭ باسشىلىعىمەن امىرلىكتەردىڭ ودان ءارى گۇلدەنە بەرەتىنىنە سەنىم ءبىلدىردى.
ءباا پرەزيدەنتى ءوز كەزەگىندە وسىنداي اۋىر جاعدايدا ارنايى كەلىپ، جەكە قولداۋ كورسەتكەنى ءۇشىن قازاقستان كوشباسشىسىنا ريزاشىلىعىن ءبىلدىردى، سونداي-اق ەلوردا كوشەلەرىنىڭ بىرىنە شەيح حاليفانىڭ اتى بەرىلەتىنىنە العىسىن ايتتى.
كەزدەسۋ سوڭىندا مەملەكەت باسشىسى ءباا پرەزيدەنتىن قازاقستانعا ساپارمەن كەلۋگە شاقىرۋىن ناقتىلادى.
”ادىرنا” ۇلتتىق پورتالى
