فوتو: adebietportal.kz
اقىن، مەملەكەت جانە قوعام قايراتكەرى ولجاس سۇلەيمەنوۆ قازاقستاننىڭ ەڭبەك ەرى مۇحتار شاحانوۆتىڭ دۇنيەدەن وتۋىنە بايلانىستى كوڭىل ايتۋ حاتىن جولدادى، دەپ حابارلايدى “ادىرنا”.
سۇلەيمەنوۆ ءوز مالىمدەمەسىندە مۇحتار شاحانوۆتىڭ قازاق رۋحانياتى مەن قوعامدىق ومىرىندەگى ورنى ەرەكشە ەكەنىن اتاپ ءوتتى. ونىڭ ايتۋىنشا، شاحانوۆ تەك پوەزيا سالاسىندا عانا ەمەس، ەل تاعدىرىنا قاتىستى ماڭىزدى ماسەلەلەردە دە باتىل ءۇن كوتەرە بىلگەن قايراتكەر بولدى.
“كورنەكتى اقىن، قوعام قايراتكەرى، قازاقستاننىڭ ەڭبەك ەرى، ۇلت رۋحانياتىنىڭ ءىرى تۇلعاسى مۇحتار شاحانوۆ دۇنيەدەن ءوتتى. ءبىز ءۇشىن ورنى تولماس اۋىر قازا.
مۇحتار شاحانوۆ – تەك پوەزيا الەمىندە عانا ەمەس، ۇلت تاعدىرىنا قاتىستى ەڭ كۇردەلى ماسەلەلەردە دە قايسار ءۇنىن جوعالتپاعان تۇلعا ەدى. ول ەل تاعدىرى سىنعا تۇسكەن كەزەڭدەردە ءاردايىم الدىڭعى شەپتەن تابىلىپ، ەلدىك مۇددە جولىندا تاباندى كۇرەس جۇرگىزدى. اسىرەسە جەلتوقسان وقيعاسى اقيقاتىن اشۋداعى قايسارلىعى مەن ادىلەت جولىنداعى باتىل ءۇنى حالىق جادىندا ماڭگى ساقتالادى. ونىڭ ارال قاسىرەتى جونىندەگى جانايقايى – ادامزات الدىنداعى ۇلكەن جاۋاپكەرشىلىكتىڭ كورىنىسى”، - دەدى ول.
ولجاس سۇلەيمەنوۆ ەكى قايراتكەردىڭ بىرگە اتقارعان ساياسي قىزمەتىنە دە توقتالدى.
“1991 جىلعى 5 قازاندا قۇرىلعان قازاقستاننىڭ حالىق كونگرەسى پارتياسى – ەل تاعدىرىنا بەيجاي قارامايتىن، ليبەرالدى-دەموكراتيالىق باعىتتى ۇستانعان ساياسي كۇش بولدى. بۇل قوزعالىس كەزدەيسوق پايدا بولعان جوق، ول حالىقتىڭ شىنايى ۇنىنە اينالۋ ءۇشىن دۇنيەگە كەلدى. سول تۇستا مۇحتار شاحانوۆ ەكەۋمىزدىڭ وسى پارتياعا توراعالىق ەتۋىمىز – ۇلكەن جاۋاپكەرشىلىك ەدى. وسى تۇرعىدان العاندا، شاحانوۆ – ناعىز ساياساتكەر. ونىڭ ءاربىر ءسوزى حالىقتىڭ مۇڭىمەن ۇندەسىپ، جۇرەگىنەن شىققان شىنايى وي رەتىندە قابىلداندى.
مەن «نەۆادا-سەمەي» قوزعالىسى ارقىلى يادرولىق سىناق پوليگونىن جابۋعا ءۇن كوتەرسەم، مۇحتار شاحانوۆ ارال تراگەدياسىن توقتاتۋعا شاقىرىپ، تابيعات پەن ادامزات تاعدىرىنىڭ بىرتۇتاستىعىن دالەلدەدى.
مارقۇمنىڭ وتباسى مەن تۋعان-تۋىستارىنا، بارشا قازاقستاندىقتارعا قايعىرىپ كوڭىل ايتامىن”، دەپ قورىتىندىلادى اقىن.
