Foto: adebietportal.kz
Aqyn, memleket jäne qoǧam qairatkerı Oljas Süleimenov Qazaqstannyŋ Eŋbek Erı Mūhtar Şahanovtyŋ dünieden ötuıne bailanysty köŋıl aitu hatyn joldady, dep habarlaidy “Adyrna”.
Süleimenov öz mälımdemesınde Mūhtar Şahanovtyŋ qazaq ruhaniiaty men qoǧamdyq ömırındegı orny erekşe ekenın atap öttı. Onyŋ aituynşa, Şahanov tek poeziia salasynda ǧana emes, el taǧdyryna qatysty maŋyzdy mäselelerde de batyl ün kötere bılgen qairatker boldy.
“Körnektı aqyn, qoǧam qairatkerı, Qazaqstannyŋ Eŋbek Erı, ūlt ruhaniiatynyŋ ırı tūlǧasy Mūhtar Şahanov dünieden öttı. Bız üşın orny tolmas auyr qaza.
Mūhtar Şahanov – tek poeziia älemınde ǧana emes, ūlt taǧdyryna qatysty eŋ kürdelı mäselelerde de qaisar ünın joǧaltpaǧan tūlǧa edı. Ol el taǧdyry synǧa tüsken kezeŋderde ärdaiym aldyŋǧy şepten tabylyp, eldık müdde jolynda tabandy küres jürgızdı. Äsırese Jeltoqsan oqiǧasy aqiqatyn aşudaǧy qaisarlyǧy men ädılet jolyndaǧy batyl ünı halyq jadynda mäŋgı saqtalady. Onyŋ Aral qasıretı jönındegı janaiqaiy – adamzat aldyndaǧy ülken jauapkerşılıktıŋ körınısı”, - dedı ol.
Oljas Süleimenov ekı qairatkerdıŋ bırge atqarǧan saiasi qyzmetıne de toqtaldy.
“1991 jylǧy 5 qazanda qūrylǧan Qazaqstannyŋ halyq kongresı partiiasy – el taǧdyryna beijai qaramaityn, liberaldy-demokratiialyq baǧytty ūstanǧan saiasi küş boldy. Būl qozǧalys kezdeisoq paida bolǧan joq, ol halyqtyŋ şynaiy ünıne ainalu üşın düniege keldı. Sol tūsta Mūhtar Şahanov ekeumızdıŋ osy partiiaǧa töraǧalyq etuımız – ülken jauapkerşılık edı. Osy tūrǧydan alǧanda, Şahanov – naǧyz saiasatker. Onyŋ ärbır sözı halyqtyŋ mūŋymen ündesıp, jüregınen şyqqan şynaiy oi retınde qabyldandy.
Men «Nevada-Semei» qozǧalysy arqyly iadrolyq synaq poligonyn jabuǧa ün kötersem, Mūhtar Şahanov Aral tragediiasyn toqtatuǧa şaqyryp, tabiǧat pen adamzat taǧdyrynyŋ bırtūtastyǧyn däleldedı.
Marqūmnyŋ otbasy men tuǧan-tuystaryna, barşa qazaqstandyqtarǧa qaiǧyryp köŋıl aitamyn”, dep qorytyndylady aqyn.
