رەسەي پرەزيدەنتى ۆلاديمير پۋتين رەسەيلىكتەردەن ءوزى باستاعان ۋكرايناعا قارسى اسكەري اگرەسسيانىڭ تابىستى بولۋى ءۇشىن ەڭبەك ەتۋدى تالاپ ەتتى، دەپ حابارلايدى «ادىرنا» ءتىلشىسى.
ول بۇل سوعىستى تاعى دا 1941–1945 جىلدارداعى كسرو-نىڭ گيتلەرلىك گەرمانياعا قارسى قورعانىس سوعىسىمەن سالىستىردى.
«ۇلى وتان سوعىسى كەزىندە بۇكىل تىل، مايدان ءۇشىن، ساربازدارىمىز ءۇشىن، قورعاۋشىلارىمىز ءۇشىن جۇمىس ىستەدى. تەك تانك، ۇشاق، زەڭبىرەك پەن سناريادتار عانا جاسالعان جوق»، — دەدى پۋتين 21 ءساۋىر كۇنى ماسكەۋدە وتكەن «كىشى وتان — رەسەيدىڭ كۇشى» فورۋمىندا.
ونىڭ ايتۋىنشا، ايەلدەر شۇلىق توقىپ، مايدانعا سالەمدەمەلەر مەن سىيلىقتار جىبەرگەن
«جەڭىس ءدال وسى بىرلىك ارقىلى كەلدى. قازىر دە سولاي بولادى»، — دەپ قوستى رەسەي پرەزيدەنتى.
ايتا كەتەيىك، جىل وتكەن سايىن سوعىستىڭ جالعاسۋىن قالايتىن رەسەيلىكتەردىڭ سانى ازايىپ بارادى. «لەۆادا-ورتالىعىنىڭ» مالىمەتىنشە، رەسەي ۋكرايناعا قارسى بەسىنشى جىل جۇرگىزىپ وتىرعان اۋقىمدى سوعىس جاعدايىندا كەلىسسوزدەردى قولدايتىن رەسەيلىكتەر سانى رەكوردتىق دەڭگەيگە جەتكەن. اقپاندا جۇرگىزىلگەن رەپرەزەنتاتيۆتى ساۋالناماعا قاتىسقانداردىڭ 67%-ى بەيبىت كەلىسسوزدەردى باستاۋ قاجەت دەپ سانايدى. سونىمەن بىرگە اسكەري ارەكەتتەردى جالعاستىرۋدى قولدايتىنداردىڭ ۇلەسى ازايىپ، باقىلاۋ جۇرگىزىلگەن ۋاقىتتاعى ەڭ تومەنگى دەڭگەيگە — 24%-عا دەيىن تۇسكەن.
