فوتو: Getty images
اقش-تىڭ بۇرىنعى ادىلەت ءمينيسترى پەم بوندي كونگرەستە وتكەن جابىق تىڭداۋدا قارجىگەر دجەففري ەپشتەين ىسىنە بايلانىستى پرەزيدەنت دونالد ترامپ تۋرالى قويىلعان سۇراقتارعا جاۋاپ بەرۋدەن باس تارتتى، دەپ حابارلايدى "ادىرنا".
بوندي اقش وكىلدەر پالاتاسىنىڭ ارنايى كوميسسياسىندا وتكەن ءتورت ساعاتتىق جابىق وتىرىسقا قاتىستى. تىڭداۋدىڭ باسپاسوزگە اشىق بولىگىندە ول ترامپ اكىمشىلىگى ەپشتەينگە قاتىستى ارحيۆتىك قۇجاتتاردى جاريالاۋ بارىسىندا «بۇرىن-سوڭدى بولماعان اشىقتىق» تانىتقانىن مالىمدەدى.
الايدا جابىق سەسسيا اياقتالعاننان كەيىن دەموكراتيالىق پارتيا وكىلدەرى بۇرىنعى ءمينيستردىڭ پرەزيدەنتكە قاتىستى سۇراقتاردىڭ بارلىعىنان جالتارعانىن ايتتى. كونگرەسس مۇشەلەرىنىڭ مالىمەتىنشە، بوندي تىڭداۋعا ادىلەت مينيسترلىگىنىڭ زاڭگەرىمەن بىرگە كەلىپ، ساپارىنىڭ ەرىكتى سيپاتتا ەكەنىن العا تارتىپ، كوپتەگەن سۇراقتارعا جاۋاپ بەرۋدەن باس تارتقان.
وكىلدەر پالاتاسىنىڭ باقىلاۋ كوميتەتىندەگى دەموكراتتاردىڭ وكىلى روبەرت گارسيا ءبونديدىڭ ترامپتىڭ ەپشتەينگە قاتىستى ارحيۆتىك ماتەريالداردى جاريالاۋ كەزىندە قانداي دا ءبىر تسەنزۋرا جاساۋ تۋرالى نۇسقاۋ بەرگەن-بەرمەگەنىنە قاتىستى سۇراقتارعا جاۋاپ بەرمەگەنىن مالىمدەدى.
ال كونگرەسسمەن دجەيمس ۋوكينشوۋ ترامپتىڭ ەپشتەيننىڭ قىلمىستارى جونىندە ولاردىڭ اشكەرەلەنۋىنە دەيىن قانشالىقتى حاباردار بولعانى تۋرالى سۇراق قويىلعانىن ايتتى. ونىڭ سوزىنشە، بوندي بۇل ماسەلەگە قاتىستى تەك «ونىڭ قانشالىقتى بىلەتىنىنەن حابارىم جوق» دەپ قىسقا جاۋاپ بەرگەن.
دەموكراتتار اكىمشىلىك ەپشتەين ىسىنە قاتىستى كەيبىر قولايسىز مالىمەتتەردىڭ جاريا بولۋىنا جول بەرمەۋگە تىرىسىپ وتىر دەپ سانايدى. ولار ارحيۆتىك قۇجاتتاردى جاريالاۋ بارىسىندا ادىلەت مينيسترلىگى بىرنەشە جابىرلەنۋشىنىڭ جەكە دەرەكتەرى مەن قۇپيا فوتوسۋرەتتەرىنىڭ جاريا بولىپ كەتۋىنە جول بەرگەنىن دە ەسكە سالدى.
دجەففري ەپشتەين 2019 جىلى كامەلەتكە تولماعانداردى جىنىستىق قاناۋ جەلىسىن ۇيىمداستىردى دەگەن ايىپپەن قاماۋعا الىنعان بولاتىن. سول جىلدىڭ تامىز ايىندا ول مانحەتتەندەگى تۇرمە كامەراسىندا ءولى كۇيىندە تابىلدى. اقش فەدەرالدىق تەرگەۋ بيۋروسى مەن ادىلەت مينيسترلىگى ونىڭ ءولىمىن وزىنە-ءوزى قول جۇمساۋ دەپ قورىتىندىلاعان.
ەپشتەينگە قاتىستى سوت قۇجاتتارىنىڭ جاريالانۋى حالىقارالىق دەڭگەيدە ۇلكەن رەزونانس تۋعىزدى. قۇجاتتاردا اقش-تىڭ بۇرىنعى پرەزيدەنتى بيلل كلينتون، حانزادا ەندريۋ جانە دونالد ترامپ سەكىلدى تانىمال تۇلعالاردىڭ ەسىمدەرى اتالعانىمەن، ولاردىڭ باسىم بولىگىنە ەپشتەيننىڭ قىلمىستارىنا قاتىسى بار دەگەن تىكەلەي ايىپ تاعىلعان جوق.
