رەسەيلىك 30 جاستاعى ساياساتتانۋشى، "ۆرەميا ەۆرازيا" باعدارلاماسىنىڭ جۇرگىزۋشىسى يۋري سامونكيننىڭ اقش پەن رەسەي اراسىنداعى تەكەرىتەس جايىنداعى 8 اقپان كۇنگى جاريالاعان ساياسي ساراپتاماسى ءدال كەلدى. ساياساتتانۋشى يۋري سامونكين 2021 جىلى كوكتەم ايلارىندا اقش پەن رەسەي اراسىنداعى كيكىلجىڭ ۋشىعىپ، ۋكراينا ماسەلەسى قولعا الىنادى جانە بۇرىنعى رەسەيدەن ىرگەسىن بولەك الىپ كەتكەن كسرو قۇرامىنداعى ەلدەرگە (مۇندا ورتالىق ازيا ەلدەرىن ايتىپ وتىر) اقش-تىڭ گەوساياسي ىقپالى ارتادى دەگەن. قارا تەڭىز بەن دنەستردە دە ساياسي پروتسەستەر كۇشەيەتىنىن بولجاعان.
اقش ءتۇپتىڭ تۇبىندە بۇرىنعى كسرو قۇرامىنداعى ەلدەردى ءوزىنىڭ ساياسي ىقپالىنا كىرگىزەدى جانە ولاردىڭ رەسەيدەن بىرتىندەپ الىستاتادى دەگەن. اقش ىقپالىمەن ىسكە اساتىن وسى پروتسەستە وزبەكستان مەن تاجىكستان تاراپى زارداپ شەگۋى مۇمكىن دەلىنگەن. ال، قازاقستان مۇمكىن بولعانشا السىزدىك تانىتپاۋى كەرەك دەپ توقتاعان. نەگە دەسەڭىز، قازاقستاندى ءوز ساياسي ىقپالىنان شىعارىپ الۋ رەسەيگە ولىمنەن دە اۋىر تيەدى.
ساياساتتانۋشى قازاقستاندى ەۋرازيالىق ەكونوميكالىق وداقتا رەسەيمەن بىرگە بولعانىمەن، ءبىر قۇيرىعى اقش-تىڭ ىقپالىندا جاتىر، سوندىقتان دا قازاقستان ءۇشىن گەوساياسي تارتىس مۇمكىندىگىنشە كۇردەلى جاعدايدا ءوتۋى مۇمكىن دەپتى. بۇل تۇستا قازاقستاننىڭ حالىقارالىق ارەنادا ۇستانعان كوپۆەكتورلى ساياساتىن اقش-تىڭ ءوزى دە ءتيىمدى كورىپ وتىر. ساياساتتانۋشى قازاقستانداعى بيلىك ۆەرتيكالىن رەسەي ءۇشىن ءتيىمدى فاكتور ساناعان. بىراق اقش-تىڭ ىقپالى ءجۇرىپ كەتۋى دە مۇمكىن دەپ بولجاپتى.
قازاقستاننىڭ سىرتقى ساياساتتا ۇستانعان وزىندىك دەربەس ساياسي پوزيتسياسىنىڭ گەوساياسي قاربالاس ۋاقىتتاردا كومەگى ءتيسىن دەپ قۇدايدان تىلەيىك!
بەكبولات قارجان،
"ادىرنا" ۇلتتىق پورتالى
