اقتاۋ قالاسىندا 24 جاستاعى مارجان ەسىمدى قىز ءوز پاتەرىندە اسىلعان كۇيدە تابىلدى. پوليتسيا بۇل وقيعانى سۋيتسيد رەتىندە تىركەپ، ءىستى جاپقان، دەپ حابارلايدى "ادىرنا" ۇلتتىق پورتالى Lada.kz-كە سىلتەپ.
الايدا مارقۇمنىڭ اتا-اناسى بۇل نۇسقامەن كەلىسپەي، كۇيەۋ بالاسىن كۇدىكتى دەپ ساناپ وتىر.
باق مالىمەتىنشە، مارجان مەديتسينالىق كوللەدجدە وقىپ، ستوماتولوگ ماماندىعىن مەڭگەرىپ جۇرگەن. ونىڭ بولاشاققا جوسپارلارى كوپ بولعان: وقۋىن اياقتاۋ، جۇمىسقا ورنالاسۋ، كاسىبي بىلىكتىلىگىن ارتتىرۋ جانە جۇرگىزۋشى كۋالىگىن الۋ.
مارقۇمنىڭ اناسىنىڭ ايتۋىنشا، قىز وتكەن جىلى تۇرمىسقا شىققاننان كەيىن وتباسىندا ءجيى جانجال تۋىنداعان. كۇيەۋى ماتەريالدىق قولداۋ كورسەتپەگەن، ال ەنەسى كەلىنىن اۋىلعا كوشۋگە ماجبۇرلەگەن. سوعان قاراماستان، مارجان وقۋىن جالعاستىرىپ، قوسىمشا جۇمىس ىستەگەن.
قايعىلى وقيعا الدىندا كۇمان تۋدىراتىن جاعداي بايقالماعان. 31 جەلتوقساندا مارجان اناسىمەن كەزدەسىپ، بولاشاق جوسپارلارىن تالقىلاعان. الايدا كەلەسى كۇنى ونىڭ قايتىس بولعانى تۋرالى حابار جەتكەن.
العاشىندا ءىس ء«وزىن-ءوزى ولتىرۋگە جەتكىزۋ» بابى بويىنشا قوزعالعانىمەن، كەيىن توقتاتىلعان. مارقۇمنىڭ تۋىستارى تەرگەۋ تولىق ءارى وبەكتيۆتى جۇرگىزىلمەگەنىن العا تارتادى. ولاردىڭ سوزىنشە، پسيحوەموتسيونالدىق جاعداي جان-جاقتى زەرتتەلمەگەن، كەيبىر تەرگەۋ ارەكەتتەرى كەش جۇرگىزىلگەن جانە بارلىق نۇسقالار تولىق قارالماعان.
