Aqtau qalasynda 24 jastaǧy Marjan esımdı qyz öz päterınde asylǧan küide tabyldy. Polisiia būl oqiǧany suisid retınde tırkep, ıstı japqan, dep habarlaidy "Adyrna" ūlttyq portaly Lada.kz-ke sıltep.
Alaida marqūmnyŋ ata-anasy būl nūsqamen kelıspei, küieu balasyn küdıktı dep sanap otyr.
BAQ mälımetınşe, Marjan medisinalyq kolledjde oqyp, stomatolog mamandyǧyn meŋgerıp jürgen. Onyŋ bolaşaqqa josparlary köp bolǧan: oquyn aiaqtau, jūmysqa ornalasu, käsıbi bılıktılıgın arttyru jäne jürgızuşı kuälıgın alu.
Marqūmnyŋ anasynyŋ aituynşa, qyz ötken jyly tūrmysqa şyqqannan keiın otbasynda jiı janjal tuyndaǧan. Küieuı materialdyq qoldau körsetpegen, al enesı kelının auylǧa köşuge mäjbürlegen. Soǧan qaramastan, Marjan oquyn jalǧastyryp, qosymşa jūmys ıstegen.
Qaiǧyly oqiǧa aldynda kümän tudyratyn jaǧdai baiqalmaǧan. 31 jeltoqsanda Marjan anasymen kezdesıp, bolaşaq josparlaryn talqylaǧan. Alaida kelesı künı onyŋ qaitys bolǧany turaly habar jetken.
Alǧaşynda ıs «özın-özı öltıruge jetkızu» baby boiynşa qozǧalǧanymen, keiın toqtatylǧan. Marqūmnyŋ tuystary tergeu tolyq ärı obektivtı jürgızılmegenın alǧa tartady. Olardyŋ sözınşe, psihoemosionaldyq jaǧdai jan-jaqty zerttelmegen, keibır tergeu äreketterı keş jürgızılgen jäne barlyq nūsqalar tolyq qaralmaǧan.
