شىمكەنتتە "ورداباسى" مەن "اقتوبە" فۋتبول كلۋبىنىڭ جانكۇيەرلەرى توبەلەستى. پوليتسيا وقيعا بولعان جەرگە بارىپ، بۇلىك سالعانداردى ۇستادى، دەپ حابارلايدى “ادىرنا” ۇلتتىق پورتالى.
ەڭبەكشى اۋداندىق پوليتسيا ءبولىمىنىڭ 102- پۋلتىنە ءۋاليحانوۆ كوشەسىندەگى "پراگا" كافەسىنىڭ جانىندا ەر ادامدار توبەلەسىپ جاتقانى تۋرالى حابارلاما كەلىپ تۇسكەن.
"وقيعا ورنىنا بىردەن پوليتسيانىڭ پاترۋلدىك ناريادتارى مەن جەدەل-تەرگەۋ توبى كەلدى. "ورداباسى" مەن "اقتوبە" فۋتبول كوماندالارىنىڭ جانكۇيەرلەرى اراسىندا ورىن العانى انىقتالدى.
وسى ۋاقىتتا پوليتسيا بولىمىنە 20 ادام جەتكىزىلدى. پوليتسەيلەر وقيعانىڭ بارلىق ءمان-جايلارىن انىقتايدى”، – دەپ مالىمدەدى شىمكەنت قالاسىنىڭ پوليتسيا دەپارتامەنتى.
ايتا كەتەيىك، قازاقستان پرەمەر-ليگاسىنىڭ "ورداباسى" - "اقتوبە" فۋتبول ماتچى 9 ساۋىردە جەرگىلىكتى ۋاقىت بويىنشا ساعات 21:00-دە باستالادى.
