الماتىدا 2008 جىلى جاسالعان ادام ولىمىنە قاتىسى بار، 17 جىل بويى حالىقارالىق ىزدەۋدە بولعان ازاماتقا سوت ۇكىمى شىقتى، دەپ حابارلايدى "ادىرنا" Politico-عا سىلتەپ.
ول ادام ولتىرۋگە كومەكتەسكەنى ءۇشىن 15 جىلعا باس بوستاندىعىنان ايىرىلدى. باس پروكۋراتۋرانىڭ مالىمەتىنشە، سوت الدىندا يۋسۋپوۆ ەسىمدى ازامات جاۋاپ بەرگەن. تەرگەۋ ماتەريالدارىنا سايكەس، قىلمىس 2008 جىلعى 19 مامىرعا قاراعان ءتۇنى الماتى قالاسىنىڭ ورتالىعىندا بولعان.
الدىن الا مالىمەت بويىنشا، يۋسۋپوۆ پەن ونىڭ سەرىكتەسى ا. كوۆالەنكو جانجالعا قاتىسقان ەر ادامعا وق اتىپ، ناتيجەسىندە ول قازا تاپقان. قىلمىستان كەيىن يۋسۋپوۆ شەتەلگە شىعىپ، جالعان قۇجاتتاردى پايدالانعان. ونىڭ سىبايلاسى ا. كوۆالەنكو 2008 جىلدىڭ جازىندا قاپشاعاي قالاسىندا پوليتسيا قىزمەتكەرىن ءولتىرۋ ءىسى بويىنشا ۇستالعان. 2009 جىلى وعان 23 جىل باس بوستاندىعىنان ايىرۋ جازاسى تاعايىندالعان. يۋسۋپوۆ «كينگ-كونگ» دەگەن لاقاپ اتىمەن دە بەلگىلى بولعان. سونىمەن قاتار ول قىرعىزستاندا 2007 جىلى بىشكەك قالاسىندا بولعان ادام ولىمىنە بايلانىستى حالىقارالىق ىزدەۋدە جۇرگەن. 2025 جىلدىڭ تامىزىندا يۋسۋپوۆ ليتۆا شەكاراسىندا ۇستالعان. سول جىلدىڭ قاراشا ايىندا ول قازاقستانعا ەكستراديتسيالاندى.
الماتى سوتى 2026 جىلعى شىلدەدە يۋسۋپوۆتى ادامدار توبىنىڭ الدىن الا ءسوز بايلاسۋى ارقىلى جاسالعان ادام ولتىرۋگە كومەكتەسكەنى ءۇشىن كىنالى دەپ تانىدى. سوت ۇكىمىمەن وعان 15 جىل مەرزىمگە باس بوستاندىعىنان ايىرۋ جازاسى تاعايىندالدى.
