استانادا 18 جاستاعى جىگىت كوپقاباتتى ءۇيدىڭ شاتىرىنان سەكىرمەك بولعان، دەپ حابارلايدى "ادىرنا".
بوزبالا ەكى ساعات بويى ءۇيدىڭ توبەسىندە جۇرگەن. بەيرەسمي اقپاراتقا سايكەس، ول سۇيىكتىسىمەن جانجالداسىپ، قاۋىپتى قادامعا بارماق بولعان.
«20 ساۋىردە پوليتسياعا كوپقاباتتى تۇرعىن ءۇيدىڭ شاتىرىندا ەر ادامنىڭ جۇرگەنى تۋرالى حابارلاما ءتۇستى. اتالعان فاكت بويىنشا ەلوردانىڭ 18 جاستاعى تۇرعىنى انىقتالدى، ول الدىن الا مالىمەت بويىنشا بيىكتەن سەكىرمەك بولعان. وقيعا ورنىندا جەدەل قىزمەتتەر جۇمىس ىستەپ جاتىر، پسيحولوگتار تارتىلدى. قايعىلى جاعدايدىڭ الدىن الۋ ءۇشىن بارلىق قاجەتتى شارالار قابىلداندى»، - دەلىنگەن حابارلامادا.
پوليتسيا قىزمەتكەرلەرى اۋماقتى قورشاۋعا الىپ، جەرگە ۇرلەنگەن جاستىق توسەدى.
قازىرگى ۋاقىتتا پوليتسيا جاس جىگىتتى شاتىردان امان-ەسەن ءتۇسىردى. وقيعانىڭ ءمان-جايى انىقتالىپ جاتىر.
