“Nomad Run” ۋلترامارافونشىلارى 8000 شاقىرىمدى باعىندىرىپ، قازاقستاننىڭ بارلىق قالا، ەلدى مەكەندەرىمەن جۇگىرىپ ءوتتى. 5 مارافونشى ازاماتتىڭ "سپورتتتىق سەيىل-cەرۋەنى" اقتاۋ قالاسىندا تۇيىندەلدى، دەپ حابارلايدى "ادىرنا" ۇلتتىق پورتالى.
اقتاۋلىقتار “Nomad Run” اتتى مارافونشىلار كوشىن سالتاناتتى تۇردە كۇتىپ الدى. جۇگىرۋ ارقىلى 8000 كم-ءدى باعىندىرىپ، قازاقستاننىڭ بارلىق قالا، ەلدى مەكەنىن ارالاعان 5 مارافونشى ەر-ازامات اقتاۋ قالاسىندا تابان تىرەگەن. وزدەرىنىڭ ايتۋىنشا، مۇنداي قادامنىڭ باستى ماقساتى - كەلەشەك ۇرپاققا ۇلگى بولۋ، دەنى ساۋ ۇرپاق تاربيەلەۋ. ازاماتتاردى كۇتىپ الۋعا قالالىق جانە وبلىستىق اكىمدىك وكىلدەرى، باق جانە قالا تۇرعىندارى تۇرعىندار قاتىستى.
“مەن ەڭ الدىمەن سىزدەرگە العىس بىلدىرگىم كەلەدى. مۇنداي ناتيجە كورسەتۋ كەز-كەلگەننىڭ قولىنان كەلمەيتىنى انىق، بۇل - ۇلكەن جاۋاپكەرشىلىكتىڭ، باتىلدىقتىڭ، شىدامدىلىقتىڭ كورىنىسى. ەلدى، جەردى ارالاپ، وسكەلەڭ ۇرپاقتىڭ بويىنداعى پاتريوتتىق سەزىمدى وياتۋ، قازاقستاننىڭ كوركەم جەرلەرىن ناسيحاتتاۋ، ىشكى ءتۋريزمدى دامىتۋعا ۇلەس قوسۋ ماقساتتارىن سپورتپەن شەبەر ۇيلەستىرۋ ارقىلى كوپكە ۇلگى بولىپ كەلەسىزدەر. دەنساۋلىقتارىڭىز مىقتى بولسىن”، - دەدى اقتاۋ قالاسى اكىمىنىڭ ورىنباسارى نۇرتاس سالي.
مارافوندى 5 ادام جۇگىرگەن، ونىڭ ىشىندە ەڭ ۇلكەنى - 55 جاستاعى مەندىباي الىمگازينوۆ. ونىڭ ايتۋىنشا، كەڭ-بايتاق قازاقستاندى شارلاپ، بۇل بەلەستى باعىندىرۋ وڭاي بولعان جوق.
“باستى ماقسات - جاستاردى سالاۋاتتى ءومىر سالتىن ۇستانۋعا شاقىرۋ. مارافوندى باستاعانداعى ۇستانىمىمىز - سوزبەن ەمەس، ارەكەتىمىز ارقىلى ۇلگى بولۋ ەدى. قوناقجايلىقتارىڭىزعا راحمەت”، - دەدى ول.
استانادان جاياۋ جۇگىرۋ ارقىلى اقتاۋعا جەتكەن 5 مارافونشى العىس حاتپەن ماراپاتتالدى.
مارافونشىلار سالتاناتتى شارادا ءسوز الىپ، بۇل جەتىستىگىن اقتاۋ قالاسىنىڭ 60 جىلدىعىنا ارناعانىن جەتكىزدى.
ورايى كەلگەندە ايتا كەتەيىك، ۋلترامارافونشىلار قازاقستاننىڭ گيننەستەر رەكوردى كىتابىنا ەنەدى.
"ادىرنا" ۇلتتىق پورتالى
