2026 جىلعى 17 ساۋىردە «اتىراۋ» فۋتبول كلۋبىن كوممەرتسيالاندىرۋ پروتسەدۋراسى اياقتالىپ، مەموراندۋمعا قول قويىلدى. ينۆەستيتسيا قۇنى 1 ملرد تەڭگەگە جۋىقتايدى.
اشىق كونكۋرستا وڭىرگە بەلگىلى كاسىپكەر، مۇناي ءوندىرۋ، تەمىرجول تاسىمالى جانە لوگيستيكا سالاسىنداعى كومپانيالاردىڭ يەسى بولات قونارباي جەڭىمپاز دەپ تانىلدى. قۇجات قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ وتاندىق فۋتبول كلۋبتارىن جەكەشەلەندىرۋ جانە كوممەرتسيالاندىرۋ جونىندەگى تاپسىرماسى اياسىندا جاساقتالدى.
اتىراۋ وبلىسىنىڭ اكىمى سەرىك شاپكەنوۆ ينۆەستورمەن كەزدەسىپ، كلۋبتىڭ جاڭا يەلەرىنە زور سەنىم ارتاتىنىن اتاپ ءوتتى:
— بۇگىن ءبىز وڭىرلىك سپورتتى دامىتۋداعى ماڭىزدى ءبىر كەزەڭدى قورىتىندىلاپ وتىرمىز. «اتىراۋ» فۋتبول كلۋبى مەملەكەت باسشىسى قاسىم-جومارت كەمەلۇلى توقاەۆتىڭ كاسىبي سپورتقا جەكە ينۆەستيتسيا تارتۋ تۋرالى تىكەلەي تاپسىرماسى نەگىزىندە رەسمي تۇردە كوممەرتسيالىق نەگىزدە جۇمىس ىستەۋگە كوشتى. بۇل شەشىم — باسقارۋدىڭ جاڭا مودەلىنە جاسالعان قادام. «اتىراۋ» فك — مۇنايلى استانانىڭ ماقتانىشى جانە سولاي بولىپ قالا بەرمەك. جەكە كاپيتالدىڭ كەلۋى كلۋبتىڭ دامۋىنا جاڭا سەرپىن بەرىپ، ادال جانكۇيەرلەردىڭ سۇيىسپەنشىلىگى مەن سەنىمىن ساقتاي وتىرىپ، ونى باسەكەگە قابىلەتتى ەتەرىنە سەنىمدىمىز.
بولات قونارباي «اتىراۋ» فۋتبول كلۋبىنىڭ جاي عانا بيزنەس-جوبا ەمەس، ايماق الدىنداعى ۇلكەن جاۋاپكەرشىلىك ەكەنىن باسا ايتتى:
— ءبىزدىڭ ماقساتىمىز — مەملەكەت باسشىسىنىڭ سپورتتى رەفورمالاۋ باعىتىن ۇستانا وتىرىپ، ءتيىمدى ءارى اشىق فۋتبول سپورتىن قۇرۋ. ءبىز كلۋبقا ۇزاق مەرزىمدى ستراتەگيامەن كەلدىك. وندا ءۇش نەگىزگى باسىمدىق بار: جاڭا ينفراقۇرىلىم سالۋ، ءوز شاكىرتتەرىمىزدى دايارلاۋ جانە جانكۇيەرلەرمەن ديالوگ ورناتۋ. وبلىس باسشىلىعىنا بىزگە سەنىم بىلدىرگەنى ءۇشىن العىس ايتامىن. ءبىز «مۇنايشىلاردىڭ» ىزگى ءداستۇرىن ساقتاۋعا كەپىلدىك بەرەمىز جانە «اتىراۋ» فۋتبول كومانداسىنىڭ قر چەمپيوناتى مەن كۋبوگىندا جوعارى ورىندارعا تالاسۋى ءۇشىن بار كۇش-جىگەرىمىزدى سالامىز.
كلۋبتىڭ جاڭا يەلەرى بالالار مەن جاسوسپىرىمدەر فۋتبولىن دامىتۋدى باسىم باعىت رەتىندە قاراستىرماق. الداعى ءۇش جىلدا كلۋبتىڭ فۋتبول ورتالىعىنداعى تاربيەلەنۋشىلەر سانىن باستاۋىش توپتاردان وقۋ-جاتتىعۋ توپتارىنا دەيىن قوسا ەسەپتەگەندە 1 000 ادامعا جەتكىزۋ جوسپارلانعان. سونىمەن قاتار وبلىس اۋداندارىندا فۋتبول ورتالىعىنىڭ فيليالدارى اشىلىپ، بۇل سپورت ءتۇرى ايماقتاعى بارلىق بالاعا قولجەتىمدى بولادى.
دارىندى بالالاردى انىقتاۋ مەن ولاردى قولداۋعا باسا نازار اۋدارىلادى. جاڭا قوجايىن قابىلەتتى بالالار مەن جاسوسپىرىمدەردى ىرىكتەۋ بويىنشا جۇيەلى سەلەكتسيالىق جۇمىستار جۇرگىزۋگە مۇددەلى. كوماندانىڭ نەگىزگى قۇرامىنا جەرگىلىكتى جانە قازاقستاندىق فۋتبول مەكتەبىنىڭ تۇلەكتەرى تارتىلادى.
كوممەرتسيالاندىرۋ شارتى ايەلدەر فۋتبولىن دامىتۋ مىندەتتەرىن دە قامتيدى. كلۋبتىڭ جاڭا يەسى كاسىبي ايەلدەر كومانداسىن جانە ونىڭ قازاقستان رەسپۋبليكاسى بىرىنشىلىگىندە ونەر كورسەتۋىن قامتاماسىز ەتۋى ءتيىس.
وسى مىندەتتەردى ىسكە اسىرۋ ءۇشىن جەكە ينۆەستيتسيالار ەسەبىنەن زاماناۋي جاتتىعۋ بازاسى مەن سپورتشىلارعا ارنالعان جاتاقحاناسى بار فۋتبول اكادەمياسى سالىنادى.
