كۇللى عالام جۇرتشىلىعىنىڭ نازارىن وزىنە اۋدارتقان فۋتبولدان ەۆروپا چەمپيوناتىنىڭ توپتىق كەزەڭى ءوز مارەسىنە جەتتى. قارت قۇرلىقتىڭ 24 قۇراماسىنىڭ باسىن قوسقان بۇل جارىس ەندى ءوز جالعاسىن 16 كوماندامەن تاپپاق. توپتىق كەزەڭدى تولىقتاي قورىتىندىلاۋ ءۇشىن العاشقى اينالىمداعى كوماندالاردىڭ ويىن-ورنەگىنە باعا بەرىپ كورسەك.
ا توبى. 1. يتاليا(9 ۇپاي), 2. ۋەلس(4), 3.شۆەيتساريا(4), 4.تۇركيا(0).
1 تۋر. تۇركيا 0-3 يتاليا، ۋەلس 1-1 شۆەيتساريا
2 تۋر. تۇركيا 0-2 ۋەلس، يتاليا 3-0 شۆەيتساريا
3 تۋر. شۆەيتساريا 3-1 تۇركيا، يتاليا 1-0 ۋەلس
تۋرنيردىڭ شىمىلدىعىن اشقان يتاليا قۇراماسى ءا دەگەننەن اق وزدەرىنىڭ مىقتىلىعىن تانىتا ءبىلدى. كانىگى مامان روبەرتو مانچيني باپتايتىن الەمنىڭ ءتورت دۇركىن چەمپيوندارى ءوز جولىندا كەزدەسكەن بارلىق قارسىلاستارىن وڭايلىقپەن جەڭىپ وتىردى. چيرو يمموبيلە، لوكاتەللي، دجوردجينو، لورەنتسو ينسينە سەكىلدى ساقا ويىنشىلار قۇرامانىڭ جەڭىسى ءۇشىن ءوز ۇلەستەرىن اياپ قالعان جوق. فۋتبولدى ۇجىمدىق ويىن دەسەك، يتالياندىقتار وسى ۇجىمدىق شەبەرلىكتىڭ ناق ۇلگىسىن كورسەتتى. بۇدان بولەك يتاليا قۇراماسى بيىلعى تۋرنيردەگى ءوز قاقپاسىنا گول جىبەرمەگەن العاشقى كومانداسى رەتىندە تىركەلدى جانە وزدەرىنىڭ جەڭىلىسسىز سەرياسىن 30 ماتچقا دەيىن ۇلعايتا ءبىلدى.
ەۆروپا ولشەمى بويىنشا ورتا كلاسستى فۋتبول مەملەكەتتەرى سانالاتىن ۋەلس پەن شۆەيتساريا قۇرامالارى ءوزارا تەڭ تارقاستى، تيىسىنشە كەلەسى اينالىمعا دا بىرگە جولداما الدى. ال تۇركيا قۇراماسى بيىلعى ءتۋرنيردىڭ ەڭ ناشار ويىن كورسەتكەن قۇرامالارىنىڭ ءبىرى رەتىندە تاريحقا ەندى. شەنول گيۋنەش باپتايتىن قۇراما تۋرنير باستالماس بۇرىن ماماندار تاراپىنان وتە جوعارى باعاعا يە بولعان. تۇرىك فۋتبولى تاريحىنداعى ەڭ الەۋەتتى كوماندانىڭ ءبىرى سانالعان بيىلعى قۇرام وكىنىشكە وراي جانكۇيەر جورامالىنداي كەرەمەت ناتيجە كورسەتە المادى. ەسەسىنە ءۇش كەزدەسۋدىڭ ۇشەۋىندە دە جەڭىلىسكە ۇشىراپ، كوماندا كاپيتانى بۋراك يىلماز ەل الدىندا كەشىرىم سۇرادى.
ۆ توبى. 1. بەلگيا(9 ۇپاي), 2. دانيا(3), 3. فينليانديا(3), 4.رەسەي فەدەراتسياسى(3).
1 تۋر. دانيا 0-1 فينليانديا، بەلگيا 3-0 رەسەي
2 تۋر. فينليانديا 0-1 رەسەي، دانيا 1-2 بەلگيا
3 تۋر. رەسەي 1-4 دانيا، فينليانديا 0-2 بەلگيا
بۇل توپتاعى جاعداي تۋرنير باستالماي تۇرىپ ءدال بولجانىپ قويعان ەدى. الەم چەمپيوناتىنىڭ قولا جۇلدەگەرلەرى، قازىرگى ۋاقىتتا فيفا تۇجىرىمى بويىنشا الەمنىڭ ۇزدىك قۇراماسى سانالاتىن بەلگيا قۇراماسىنىڭ ءبىرىنشى ورىن الاتىنىنا ەشكىمنىڭ قارسىلىعى جوق. باستى ينتريگا بۇل توپتان كىمنىڭ پلەي-وفف باسەكەسىنە جولداما الاتىنى. كەۆين دە بريۋينە باستاعان بەلگيالىقتار ەشكىمگە شىداس بەرگەن جوق. رەسەيدى 3-0, دانيانى 2-1, فينليانديانى 2-0 ەسەپتەرىمەن ۇتىپ، ەش قينالماستان ءوز توبىندا كوشباسشىلىققا يە بولدى.
ەكىنشى ورىن ءتۋرنيردىڭ ەڭ جانكەشتى كومانداسى دانياعا بۇيىردا. ولاي دەۋىمىزگە دە سەبەپ بار. العاشقى تۋرداعى فينليانديامەن بولعان ويىندا دانيالىق جارتىلاي قورعاۋشى كريستيان ەريكسەن ەسىنەن تانىپ قۇلاپ، دەرەۋ اۋرۋحاناعا جەتكىزىلگەن بولاتىن. كورەر جارىعى بار ەكەن، دانيالىق جۇلدىز فۋتبولشىنىڭ قازىرگى جاعدايى قالىپتى. جاقىن ارادا جۇرەگىنە ارنايى اپپارات قوندىرادى دەگەن جاڭالىقتار كۇن سايىن ەۆروپالىق باق بەتتەرىنەن جارىق كورۋدە. دانيا قۇراماسى فينليانديا مەن بەلگياعا جەڭىلگەنىنە قاراماستان رەسەي فۋتبولشىلارىن 4-1 ەسەبىمەن ۇتىپ، كەلەسى اينالىمعا ەڭ سوڭعى ساتتە جولداما جەڭىپ الدى. توپتا ءۇشىنشى جانە ءتورتىنشى ورىنداردى يەمدەنگەن فينليانديا جانە رەسەي قۇرامالارى ءوز ەلدەرىنە قايتتى. قىزىعى، فينليانديالىق فۋتبولشىلار ەۋرودوداعا جولداما العاندارى ءۇشىن ءوز ەلدەرىنىڭ قاھارماندارى اتانسا، رەسەيلىك اياقدوپ شەبەرلەرى توپتا سوڭعى ورىن العاندارى ءۇشىن ءوز ەلدەرىندەگى ەڭ كوپ سىنعا ۇشىراعان تۇلعالاردىڭ بىرىنە اينالدى. ەڭ كوپ سىن باس باپكەر ستانيسلاۆ چەرچەسوۆ پەن كاپيتان ارتەم دزيۋباعا تاعىلۋدا.
س توبى. 1. نيدەرلاندى(9 ۇپاي), 2. اۆستريا(6), 3. ۋكراينا(3), 4. سولتۇستىك ماكەدونيا (0).
1 تۋر. اۆستريا 3-1 سولتۇستىك ماكەدونيا، نيدەرلاندى 3-2 ۋكراينا
2 تۋر. ۋكراينا 2-1 سولتۇستىك ماكەدونيا، نيدەرلاندى 2-0 اۆستريا
3 تۋر. سولتۇستىك ماكەدونيا 0-3 نيدەرلاندى، ۋكراينا 0-1 اۆستريا
وسىعان دەيىنگى وتكەن الەم جانە ەۆروپا بىرىنشىلىكتەرىنە قارا باسىپ جولداما الا الماي جۇرگەن نيدەرلاندى فۋتبولشىلارى بۇل جولعى باسەكەدە كوپشىلىكتى ءوز ويىندارىمەن باۋراپ الدى. باس باپكەر فرانك دە بۋر قىزعالداقتى ەلدىڭ فۋتبولشىلارىنىڭ قولتاڭباسىنا اينالعان پوزيتسيالىق فۋتبولدىڭ جارقىن ۇلگىسىن كورسەتۋدە. بۇعان دالەل بولارلىق انىق فاكت دجوردجينو ۆەينالدۋم، مەمفيس دەپاي سەكىلدى جۇلدىزداردان قۇرالعان نيدەرلاندىلىقتاردىڭ ءوز الدارىنا كەلگەن ءۇش قۇرامانى دا ەركىن تىزە بۇكتىرۋى. تەك ۋكرايناعا قارسى ويىن سوڭىنا دەيىن ينتريگاعا تولى ءوتىپ، 85 مينۋتتا عانا كوماندانىڭ جاس جۇلدىزى ديۋمفريس قارسىلاس قاقپاسىن ءدال كوزدەپ، جەڭىستى جۇلىپ اكەتتى.
پلەي-وفف ساتىسىنا بەرىلەتىن كەلەسى جولدامالارعا ءوز كەزەگىندە اۆستريا جانە ۋكراينا قۇرامالارى يە بولدى. ءوز ارالارىندا اۆستريا باسىمدىق تانىتقانىمەن، قوس قۇراما دا سولتۇستىك ماكەدونياعا قارسى كەزدەسۋدە مىقتىلىقتارىن دالەلدەي ءبىلدى. اڭىز ويىنشى اندرەي شەۆچەنكو باپتايتىن ۋكراينا قۇراماسى ءوز تاريحىندا تۇڭعىش رەت ەۆروپا چەمپيوناتىنىڭ پلەي-وفف سىنىنا جولداما ۇتىپ الدى.
تاريحىندا تۇڭعىش رەت ەۋرودوداعا قاتىسۋ قۇرمەتىنە يە بولعان ماكەدوندىقتار ءوز ەلدەرىنە باتىرلار سەكىلدى ورالدى. جانكۇيەرلەردىڭ ايتۋىنشا كوماندا جەڭىلىسكە ۇشىراسا دا الاڭدا سوڭعى ساتكە دەيىن تىرىسىپ باقتى، ەل نامىسى تاپتالمادى.
D توبى. 1. انگليا(7 ۇپاي), 2. حورۆاتيا(4), 3. چەحيا(4), 4. شوتلانديا(1).
1 تۋر. انگليا 1-0 حورۆاتيا، شوتلانديا 0-2 چەحيا
2 تۋر. حورۆاتيا 1-1 چەحيا، انگليا 0-0 شوتلانديا
3 تۋر. حورۆاتيا 3-1 شوتلانديا، چەحيا 0-1 انگليا
اياقدوپ ويىنىن ويلاپ تاپقان ەل رەتىندە رەسمي تۇردە مويىندالعان اعىلشىن قۇراماسىنىڭ ويىنى ازىرگە سۇرەڭسىز. توپتىق كەزەڭدەگى ءۇش ويىندا دا اعىلشىندىق فۋتبولشىلار ءوز مۇمكىندىكتەرىن جۇزەگە اسىرا الماۋ جاعىنان كوپ باسىندا تۇر، ستاتيستيكا دا وتقا ماي قۇيا تۇسەدى. دەسەك تە انگليا قۇراماسى ۇپايدان شاشاۋ شىعارماستان د توبىندا كوش باستادى. جانكۇيەرلەر بولسا كوماندا كاپيتانى حارري كەيننىڭ بابىنا الاڭداۋلى. وسىعان دەيىن وتكەن الەم چەمپيوناتىندا «التىن بۋتسا» جۇلدەسىن ۇتىپ العان اعىلشىندىق شابۋىلشى ازىرگە قارسىلاستار قاقپاسىن ءدال كوزدەي الماۋدا.
حورۆاتيا مەن چەحيا ءوزارا تەڭ تارقاستى جانە 1/8 فينالعا جولدامانى جەڭىپ الدى. شوتلانديا قاقپاسىنا 46 مەتر قاشىقتىقتان گول سوققان چەح شابۋىلشىسى پاتريك شيك ءتۋرنيردىڭ 40 جىلدىق رەكوردىنا تۇزەتۋلەر ەنگىزدى. جالقى ۇپايدى اعىلشىندارعا قارسى ويىندا يەلەنگەن شوتلانديا ەلىنىڭ فۋتبولشىلارى ۇيلەرىنە اتتاندى.
ە توبى. 1. شۆەتسيا(7ۇپاي), 2. يسپانيا(5), 3. سلوۆاكيا(3), 4. پولشا(1).
1 تۋر. پولشا 1-2 سلوۆاكيا، يسپانيا 0-0 شۆەتسيا
2 تۋر. شۆەتسيا 1-0 سلوۆاكيا، يسپانيا 1-1 پولشا
3 تۋر. سلوۆاكيا 0-5 يسپانيا، شۆەتسيا 3-2 پولشا
الاڭداعى كوشباسشى جانە الاڭ سىرتىنداعى يدەيالىق موتيۆاتور سانالاتىن زلاتان يبراگيموۆيچتىڭ جاراقات العانىنان كەيىن شۆەتسيا قۇراماسىنىڭ ۇلكەن ناتيجە كورسەتۋىنە سەنگەن جانكۇيەرلەر ساۋساقپەن سانارلىقتاي ەدى. ايتىلعان بولجامدارعا قاراعاندا جوسپاردى اسىرا ورىنداعان شۆەدتەر توپتاعى ءبىرىنشى ورىندى قينالماي يەمدەندى دەسەك تە بولادى. الەم، ەۆروپا چەمپيوندارى يسپانيا قۇراماسىمەن وتكەن كەزدەسۋدە دە ۇستامدى ويىنىمەن كوزگە تۇسكەن شۆەد فۋتبولشىلارى قالعان ويىنداردا دا ۇپايدان شاشاۋ شىعارمادى.
بۋىن الماسۋ كەزەڭىن ۇلكەن قيىندىقپەن وتكىزىپ جاتقان يسپانيا قۇراماسى پلەي-وفف جولداماسىنا سوڭعى تۋردا عانا يە بولدى. تۋرنير باستالماي جاتىپ كوماندا كاپيتانى سەرحيو بۋسكەتستىڭ كورونوۆيرۋسپەن سىرقاتتانىپ قالۋى كوماندانىڭ ىشكى اتموسفەراسىنا ءوز اسەرىن تيگىزگەنى انىق. ونىڭ ۇستىنە كوماندانىڭ نەگىزگى ورتالىق شابۋىلشىسى سانالاتىن الۆارو موراتانىڭ ەسەپسىز قاتەلىكتەرى جانكۇيەرلەر جانارىن جاسقا تولتىردى. ءبىر كەزدەردەگى داۆيد ۆيليا، حاۆي، ينەستا سەكىلدى تەڭبىل دوپ شەبەرلەرىنىڭ ورنىن قازىرگى جاس بۋىن الۆارو موراتا، ميكەل ويارسابال سەكىلدى ويىنشىلار جوقتاتپاۋدا دەسەك، جاڭىلىسقان بولار ەدىك.
جارىس جولىن اياقتاعان سلوۆاكيا مەن پولشا تۋرالى كوپ ءسوزدىڭ ءسىرا قاجەتى شامالى. الەمنىڭ ۇزدىك فۋتبولشىسى سانالاتىن روبەرت لەۆاندوۆسكيدىڭ كومانداسى پولشا ءۇش كەزدەسۋدە ءبىر رەت تە جەڭىس تۇعىرىنان كورىنە المادى. ال سلوۆاكيا قۇراماسى قولدارىندا تۇرعان پلەي-وفف كەزەڭىنىڭ جولداماسىنان يسپانيامەن بولعان كەزدەسۋدە ايىرىلىپ قالدى.
F توبى. 1. فرانتسيا(5 ۇپاي), 2. گەرمانيا(4), 3. پورتۋگاليا(3), 4. ۆەنگريا(2).
1 تۋر. ۆەنگريا 0-3 پورتۋگاليا، فرانتسيا 1-0 گەرمانيا
2 تۋر. ۆەنگريا 1-1 فرانتسيا، پورتۋگاليا 2-4 گەرمانيا
3 تۋر. پورتۋگاليا 2-2 فرانتسيا، گەرمانيا 2-2 ۆەنگريا
بۇل توپتا بارلىعى دا بار. ەكى بىردەي الەم چەمپيونى جانە سوڭعى ەۆروپا چەمپيونىنىڭ باسى بىرىككەن بۇل توپ ناعىز فۋتبولدىڭ قىزعان ايماعىنا اينالدى. ءوز قاتارلارىنا ەكس شابۋىلشىسى سانالعان كارىم بەنزەمانى قوسقان فرانتسۋزدار جەڭىلىستىڭ اششى ءدامىن تاتپاستان كەلەسى اينالىمعا جولداما الدى. قورعانىس ارقىلى قارىمتا شابۋىلدار جاساۋ ولاردىڭ قاندارىنا سىڭگەن فۋتبول دەسەك تە بولادى. ءوز كلۋبىندا الا-قۇلا ويىن كورسەتەتىن پول پوگبا ۇلتتىق قۇراما جەيدەسىن كيگەن ساتتەن-اق قۇلپىرىپ شىعا كەلەدى. چەلسيدىڭ جارتىلاي قورعانىس كوشباسشىسى نگولو كانتە دە قۇراما ءۇشىن ايانىپ قالىپ جاتقان جوق. بارسەلونا شابۋىلشىسى انتۋان گريزماندى دا بۇل قاتارعا قوسساق بولادى. الدا-جالدا ءبىر قاتەلىكتەرگە تاپ بولماسا باس جۇلدەدەن باستى ۇمىتكەردىڭ ءبىرى وسى فرانتسيا ەكەنىن ەستەرىڭىزگە تاعى ءبىر مارتە سالا كەتەيىك.
2018 جىلعى الەم چەمپيوناتىنداعى ساتسىزدىكتەرىنەن كەيىن ءوز-وزدەرىنە كەلە الماي جۇرگەن نەمىستەر نامىسقا تىرىسىپ، اۋپىرىمدەپ ءجۇرىپ كەلەسى اينالىمعا شىقتى. ولارعا سوڭعى تۋردا قارسى تۇرعان ۆەنگريا قۇراماسىن ماقتاماسقا بولمايدى. توپتا كوش سوڭىندا قالادى دەپ ەسەپتەلىنگەن قۇراما ءۇش بىردەي قارسىلاسىنا دا اسقان ۇقىپتىلىقپەن تويتارىس بەردى. تاجىريبەنىڭ جەتكىلىكسىزدىگىنەن پورتۋگالياعا جول بەردى، فرانتسيا جانە گەرمانيا قۇرامالارىمەن تەڭ تارقاستى.
وتكەن ەۋرونىڭ جەڭىمپازدارى بۇل جولى دا چەمپيوندىقتى باستى ماقسات رەتىندە كوزدەگەنى انىق. كريشتيانۋ رونالدۋدىڭ ءار الاڭعا شىعۋىنىڭ ءوزى رەكوردتىق كورسەتكىشكە اينالدى. الدىمەن 5 بىردەي ەۋرودودادا ونەر كورسەتكەن جالعىز ويىنشى اتانسا، كەيىن ەۆروپا چەمپيوناتىندا ەڭ كوپ الاڭعا شىققان، ەڭ كوپ گول سوققان ويىنشى اتاندى. فرانتسيا قاقپاسىنا سوققان گولدارىنان كەيىن ءتىپتى فيفا تاريحىنداعى ۇلتتىق قۇرامالار بومبارديرى يراندىق الي داەيدىڭ رەكوردىن قايتالادى(109 گول). 36 جاستاعى پورتۋگاليالىق فۋتبولشىعا تاڭدانباسقا بولمايدى.
جارىس قورىتىندىسى بويىنشا F توبىنان كەلەسى اينالىمعا جولدامانى فرانتسيا، گەرمانيا، پورتۋگاليا قۇرامالارى ۇتىپ الدى.
ەۆروپا چەمپيوناتىنىڭ 1/8 فينالدىق ويىندارى 26 ماۋسىم كۇنى باستاۋ الماق. جارىس جولىندا قالعان 16 كوماندا ءوزارا مىقتىنى انىقتاپ، قارت قۇرلىقتىڭ ۇزدىك كومانداسى اتاعىن ءوزارا ساراپقا سالاتىن بولادى. فۋتبول باسەكەسىن بىرگە تاماشالايىق. جەڭىستى كۇندەردە جولىققانشا!
قۋاندىق كورگەنوۆ
