اتىراۋدىڭ بالاۋسا شاعىناۋدانىنداعى ءبىر كوشەگە قر تاەكۆوندو (WT) فەدەراتسياسىنىڭ نەگىزىن قالاۋشى، حالىقارالىق دارەجەدەگى جاتتىقتىرۋشى مۇستافا وزتۇرىكتىڭ ەسىمى بەرىلدى. سالتاناتتى شارا اياسىندا وعان ارنالعان ەسكەرتكىش تاقتا دا ورناتىلدى. بۇل تۋرالى وڭىرلىك كوممۋنيكاتسيالار قىزمەتى مالىمدەدى، دەپ حابارلايدى "ادىرنا".
كوشەنىڭ اشىلۋ راسىمىنە مۇستافا وزتۇرىكتىڭ قىزى نەسليحان وزتۇرىك پەن ءىنىسى ومەر تايجى ارنايى كەلدى. سونىمەن قاتار سپورت ۇيىمدارىنىڭ باسشىلارى، سپورت ارداگەرلەرى، جاتتىقتىرۋشىلار جانە قالا تۇرعىندارى جينالدى.
«تاريحي وتانىمىزعا قايتا كەلگەنىمىزگە قۋانىشتىمىز. اعامنىڭ اتى بەرىلگەن كوشەنى اشۋعا اتسالىسقان بارشاڭىزعا العىس ايتامىن. كاسپي ماڭى تۇرعىندارىنا كورسەتكەن قۇرمەتتەرىڭىز ءۇشىن ريزاشىلىق بىلدىرەمىن»، - دەدى ومەر تايجى.
مۇستافا وزتۇرىك - تاەكۆوندودان 6 داندى يەلەنگەن العاشقى قازاق جانە تاەكۆوندودان 6 دۇركىن الەم چەمپيونى. ول تۇركيانىڭ ستامبۋل قالاسى مەن گەرمانيانىڭ كەلن، ميۋنحەن قالالارىندا تاەكۆوندو مەكتەبىن اشىپ، گەرمانيادا ارنايى قارۋلى كۇشتەر مەن پوليتسەيلەردى جاۋىنگەرلىك ونەرگە باۋلىعان.
مۇستافا وزتۇرىك تاەكۆوندودان جاتتىقتىراتىن تۇركيا قۇراماسى 1980 جىلى الەم چەمپيوناتىندا ەكىنشى ورىن الىپ، سەنساتسيا جاسادى. ال 1990 جىلدىڭ كوكتەمىندە سول كەزدەگى كومسومول حاتشىسى يمانعالي تاسماعامبەتوۆتىڭ شاقىرۋىمەن اتاجۇرتقا ورالعان. ەلىمىز تاۋەلسىزدىك العاننان كەيىن الماتىدا سپورت مەكتەبىن اشتى.
بۇعان دەيىن، 2000 جىلى، الماتىداعى ءبىر كوشەگە دە مۇستافا وزتۇرىكتىڭ ەسىمى بەرىلگەن ەدى. ال 2004 جىلى ونىڭ 50 جىلدىق مەرەيتويى اياسىندا الماتى وبلىسى تالعار اۋدانىنا قاراستى بەساعاش اۋىلىندا ۇلى سپورتشىعا ارنالعان ەسكەرتكىش ورناتىلعان.
ايتا كەتسەك، كەشە، 23 قاراشا مۇستافا وزتۇرىكتىڭ دۇنيەگە كەلگەن كۇنى.
