وقۋشىلار مازمۇنداما، شىعارما جانە ديكتانت جازاتىن بولادى، دەپ حابارلايدى "ادىرنا" ۇلتتىق پورتالى.
بۇل تۋرالى جۇلدىز سۇلەيمەنوۆا مالىمدەدى.
ءمينيستردىڭ ايتۋىنشا، قازىرگى تاڭدا مەكتەپ باعدارلاماسى جاڭارتىلىپ جاتىر. جاڭا وزگەرىستەر اياسىندا بىرقاتار جاڭا پاندەر ەنگىزىلىپ، كەيبىر باعىتتار كۇشەيتىلەدى.
اتاپ ايتقاندا، 5–7 سىنىپتاردا «كونستيتۋتسيا نەگىزدەرى»، 8–9 سىنىپتاردا «زاڭ جانە ءتارتىپ» پاندەرى وقىتىلادى. ال 10–11 سىنىپتاردا «قۇقىق نەگىزدەرى» مىندەتتى ءپان رەتىندە ەنگىزىلمەك.
سونىمەن قاتار، 8–9 سىنىپتاردا «قازاقستان گەوگرافياسى» ءپانى اپتاسىنا ەكى ساعاتتان وقىتىلاتىن بولادى.
مينيسترلىك مالىمەتىنشە، جازباشا جۇمىستاردى قايتا ەنگىزۋ وقۋشىلاردىڭ ءبىلىم دەڭگەيىن كەشەندى باعالاۋعا جانە فۋنكتسيونالدىق ساۋاتتىلىعىن ارتتىرۋعا باعىتتالعان.
«مازمۇنداما، شىعارما جانە ديكتانت قايتا ەنگىزىلەدى. بۇل وزگەرىستەر تىلدىك داعدىلاردى دامىتۋعا جانە وقۋشىلاردىڭ ويلاۋ قابىلەتىن جەتىلدىرۋگە باعىتتالعان»، – دەلىنگەن رەسمي اقپاراتتا.
