وسكەمەندە پىشاق جاراقاتىن العان وقۋشىلاردىڭ ءىسى تەكسەرىلىپ جاتىر، دەپ حابارلايدى "ادىرنا" ءتىلشىسى قازاقپاراتقا سىلتەپ.
بىرنەشە كۇن بۇرىن قالاداعى ورتا مەكتەپتەردىڭ بىرىندە ەرەگەسىپ قالعان ەكى وقۋشىنىڭ ءبىرى قالتاسىنان جينالمالى پىشاق الىپ، قارسىلاسىنا سۇعىپ جىبەرگەن. پىشاق الىپ جۇرگەن وقۋشى دا ابايسىزدا ءوزىن دە جارالاپ العان.
شقو دەنساۋلىق ساقتاۋ باسقارماسى ءباسپاسوز قىزمەتىنىڭ اقپاراتىنشا جاراقات العان وقۋشىلار قالالىق اۋرۋحاناعا جاتقىزىلعان. قازىر ولاردىڭ جاعدايى قالىپتى.
ال وسكەمەن قالالىق ءبىلىم ءبولىمىنىڭ حابارلاۋىنشا، وقيعا ورىن العان مەكتەپتىڭ ديرەكتورىنا قاتىستى تەكسەرۋ جۇرگىزىلىپ جاتىر.
«اتالعان فاكتى بويىنشا ءبىلىم ءبولىمى قىزمەتتىك تەكسەرۋ جۇرگىزىپ جاتىر. مەكتەپ اكىمشىلىگى تارتىپتىك جازاعا تارتىلدى. اۋرۋحاناعا جاتقىزىلعان بالالاردىڭ جاعدايى تۇراقتى باقىلاۋدا. مەكتەپ ديرەكتورىنا قاتىستى قىزمەتتىك تەكسەرۋ تاعايىندالعان. قابىلدانعان شارالار تۋرالى قوسىمشا حابارلاناتىن بولادى»، - دەلىنگەن اقپاراتتا.
