قازاقستاندىق وقۋشى قىزدار ەندى ساباققا ورامالمەن قاتىسا الاتىن بولدى، دەپ حابارلايدى "ادىرنا" ۇلتتىق پورتالى.
جوعارعى سوت بالالاردىڭ ءبىلىم الۋ قۇقىعى شەكتەلىپ جاتقانىن اتاپ ءوتىپ، ءبىلىم بەرۋ ۇيىمدارىنا بۇل تىيىمدى زاڭسىز دەپ تاپتى.
بۇل اقپاراتتى قۇقىق قورعاۋشى جاسلان ايتماعانبەتوۆ Instagram پاراقشاسىندا جوعارعى سوت وبلىستىق سوتتىڭ شەشىمىن جوققا شىعارعانىن حابارلادى.
"جوعارعى سوت قىزداردىڭ مەكتەپتە ورامال تاققانىنا بايلانىستى بالالاردىڭ ءبىلىم الۋ قۇقىعى مەن ورامال ماسەلەسىنە نۇكتە قويدى. جوعارعى سوتى وبلىستىق سوتتىڭ شەشىمىن بۇزىپ، وقۋشىنىڭ ورامالىنا بايلانىستى شەكتەۋلەر ءبىلىم الۋ قۇقىعىن بۇزادى دەپ تانىدى. بالالاردىڭ قۇقىقتارىن قورعاۋعا بىرنەشە زاڭگەر مەن بەلسەندىلەر قاتىستى", – دەيدى قۇقىق قورعاۋشى.
قورعاۋشى بۇل شەشىمدى ءتورت وبلىستىڭ سوتتارى دا مويىنداعانىن حابارلادى.
"مينيسترلىك ورامالمەن كۇرەسىپ جاتقاندا، قازاقستاندا بالالار اراسىنداعى سۋيتسيد پەن زورلىق-زومبىلىق كوبەيىپ كەتتى. بۇل وتە وكىنىشتى. قالاي بولعاندا دا سوت بيلىگى مينيسترلىكتىڭ ۇستانىمىنا ەمەس، زاڭ نورمالارىنا قارايتىنى جاقسى", – دەدى ول.
قۇقىق قورعاۋشىنىڭ بۇل جازباسى جەلىدە ءبىراز تالقىلاندى.
"بالاعا مەكتەپتە ورامال تاعۋدىڭ قاجەتى جوق دەپ ويلايمىن. قازىر بالالار وتە قاتىگەز، ولار مۇنى مازاق قىلۋى مۇمكىن. ەكىنشىدەن، بۇل – قىزدىڭ ەمەس، اتا-اناسىنىڭ قالاۋى. قىز ءوسسىن، ورامال تاعا ما، جوق پا، ءوزى شەشەدى”، – دەدى جەلى قولدانۋشىسى.
بۇعان دەيىن وقۋ-اعارتۋ ءمينيسترى عاني بەيسەمباەۆ ءبىلىم وشاقتارىندا بارلىق وقۋشىنىڭ مەكتەپ فورماسىن كيۋى ماڭىزدى ەكەنىن ايتقان بولاتىن. ول ءبىلىم سالاسىنا قاتىستى ماسەلەلەردى باسقا اسپەكتىلەرمەن شاتاستىرماۋ كەرەگىن ءتۇسىندىردى.
