فوتو: Reuters
پاريجدە وقۋشىلاردىڭ ءىرى شەرۋى قارساڭىندا بىرنەشە رۇقسات ەتىلمەگەن نارازىلىق اكتسياسى ءوتىپ، ولاردىڭ ءبىرى پوليتسيامەن قاقتىعىسقا ۇلاسقان، دەپ حابارلايدى "ادىرنا" ۇلتىق پورتالى تاسس-قا سىلتەپ.
باق دەرەگىنشە، قۇقىق قورعاۋ ورگاندارى نارازىلىق بىلدىرۋشىلەرگە قارسى كوزدەن جاس اعىزاتىن گاز قولدانعان.
سەنبى كۇنى پاريجدە جوعارى سىنىپ وقۋشىلارى مەن ستۋدەنتتەردىڭ جاپپاي شەرۋى جوسپارلانعان. وعان وقۋشىلار مەن ستۋدەنتتەردەن بولەك، بەلسەندىلەر، «سارى كەۋدەشەلىلەر» قوزعالىسىنىڭ جاقتاستارى، تاكسي جۇرگىزۋشىلەرى، مەدبيكەلەر، قۇرىلىسشىلار جانە كاسىپوداق وكىلدەرى قاتىسادى دەپ كۇتىلگەن. شەرۋ رەسپۋبليكا الاڭىنان كليشي الاڭىنا دەيىن ءوتۋى ءتيىس بولعان.
ال باستيليا الاڭى ماڭىندا جوسپارلانعان باسقا اكتسيانى قالالىق پوليتسيا توقتاتقان.
نەگىزگى شەرۋ باستالعانعا دەيىن قالادا بيلىكپەن كەلىسىلمەگەن بىرنەشە نارازىلىق اكتسياسى تىركەلگەن. سونىڭ ءبىرى ۇلكەن جەلەك اۋدانىندا بولعان. جينالعاندار «فرانتسياعا بوستاندىق!» جانە «ماكرون وتستاۆكاعا كەتسىن!» دەپ ۇرانداتقان.
كەيىن جاستار مەن پوليتسيا قىزمەتكەرلەرى اراسىندا قاقتىعىس باستالعان. نارازىلىق بىلدىرۋشىلەر جەلەككە ورناتىلعان مەتالل قورشاۋلار مەن قوقىس جاشىكتەرىن اۋدارىپ، قۇقىق قورعاۋ ورگاندارىنىڭ قوزعالىسىنا كەدەرگى كەلتىرگەن.
تاسس اگەنتتىگىنىڭ حابارلاۋىنشا، پاريجدە نەگىزگى ەكى شەرۋ باستالعانعا دەيىن پوليتسيا 40 ادامدى ۇستاعان. ولاردىڭ كوپشىلىگىنە قارۋ جانە تىيىم سالىنعان قورعانىس قۇرالدارىن الىپ ءجۇردى دەگەن كۇدىك كەلتىرىلگەن.
بۇدان بولەك، تاڭەرتەڭ ءبىر توپ ادام CNEWS تەلەارناسى مەن Europe 1 راديوسىنىڭ رەداكتسيالارى ورنالاسقان عيماراتتىڭ كىرەبەرىسىن بوگەپ، بىرنەشە تەرەزەنى تاسپەن سىندىرعان. پوليتسيا ارالاسقاننان كەيىن وسى وقيعاعا قاتىسى بار دەگەن تاعى 21 ادام ۇستالعان.
