ەلىمىزدە مەملەكەت ەسەبىنەن تەگىن تاراتىلۋى ءتيىس مىڭداعان ءدارى-دارمەكتىڭ ءدارىحانالاردا زاڭسىز ساتىلعان، دەپ حابارلايدى "ادىرنا" ۇلتتىق پورتالى.
بۇل زاڭسىزدىقتى قازاقستان رەسپۋبليكاسى دەنساۋلىق ساقتاۋ مينيسترلىگى ەنگىزگەن جاڭا تسيفرلىق تاڭبالاۋ جۇيەسى ارقىلى انىقتاعان.
2024 جىلدىڭ 1 شىلدەسىنەن باستاپ ىسكە قوسىلعان دارىلەردى تاڭبالاۋ جۇيەسى العاشقى ناتيجەسىن كورسەتىپ، ەل بويىنشا 4 114 پرەپاراتتىڭ زاڭسىز ساتىلعانىن تىركەدى. اتالعان دارىلەر ناۋقاستارعا تەگىن مەديتسينالىق كومەكتىڭ كەپىلدەندىرىلگەن كولەمى اياسىندا بەرىلۋى ءتيىس بولعان.
زاڭسىز ساۋداعا تۇسكەن پرەپاراتتاردىڭ قاتارىندا كۇندەلىكتى قولدانىلاتىن ناتري ءحلوريدى مەن گليۋكوزا ەرىتىندىلەرى، انتيبيوتيكتەردىڭ بىرنەشە ءتۇرى، قانت ديابەتى مەن قان قىسىمى سەكىلدى سوزىلمالى اۋرۋلارعا قارسى ماڭىزدى دارىلەر بار.
مينيسترلىك جۇرگىزگەن تەكسەرىستەر ناتيجەسىندە 74 نىسان جوسپاردان تىس باقىلاۋدان ءوتتى. سونىڭ ىشىندە 31 مەكەمەگە جالپى سوماسى 12,3 ملن تەڭگە ايىپپۇل سالىنسا، 43 ۇيىمعا زاڭ بۇزۋشىلىقتاردى جويۋ تۋرالى قاتاڭ ەسكەرتۋ بەرىلدى.
الدىن الا دەرەكتەرگە سايكەس، كەيبىر ۇيىمدار ءبىر عانا كودتى 480 مىڭ رەتتەن استام قايتالاپ قولدانۋ ارقىلى زاڭسىز ارەكەتكە بارعان. قازىرگى ۋاقىتتا مەملەكەت ساتىپ العان دارىلەردىڭ جەكەمەنشىك دارىحانالارعا قالاي تۇسكەنى جان-جاقتى تەكسەرىلىپ جاتىر.
جينالعان ماتەريالدار قازاقستان رەسپۋبليكاسىنىڭ قارجىلىق مونيتورينگ اگەنتتىگى مەن ۇقك قاراۋىنا جولداندى. ەندى بۇل ىسكە قۇقىق قورعاۋ ورگاندارى باعا بەرەتىن بولادى.
