بولات نازارباەۆ 5 جىل ىشىندە قاسكەلەڭ، تالعار، نۇر-سۇلتان قالاسىنان جەرلەردى زاڭسىز العان. بۇل تۋرالى «AMANAT» پارتياسى جانىنداعى مەملەكەتتىك باسقارۋدى دامىتۋ جانە سىبايلاس جەمقورلىققا قارسى ءىس-قيمىل جونىندەگى رەسپۋبليكالىق قوعامدىق كەڭەستىڭ كەزەكتى وتىرىسى كەزىندە كەڭەس توراعاسى ەرلان سايروۆ ايتتى، دەپ حابارلايدى “ادىرنا” ۇلتتىق پورتالى.
«قازىر ەل-جۇرتتىڭ بۇگىنگى جاعدايىنا نازار اۋدارۋ كەرەك. ينفلياتسيا دەڭگەيى وتە جوعارى. حالىق كەدەيلەنىپ بارادى. جانار-جاعارماي باعاسى شارىقتاپ، سولياركانىڭ ءليترى 450 تەڭگەگە جەتتى. قاراپايىم شارۋا قالاي كۇن كورەدى؟ وتكەن بيلىك كەزىندەگى ىعايلار مەن سىعايلاردىڭ جەمقورلىق، پروتەكتسيا ىستەرىنەن ساباق الۋىمىز كەرەك. بولات نازارباەۆ ەسىمدى ازامات 5 جىل ىشىندە قاسكەلەڭ، تالعار، نۇر-سۇلتان قالالارىندا كوتتەدج قالاشىعىن جانە اكىمشىلىك عيمارات پەن بازار سالۋعا 240 گەكتار بولاتىن 59 جەر تەلىمىن العان دەگەن اقپارات بار. بۇل كىسىنىڭ فاميلياسىنا بەرىلگەن قۇجاتتار مەنىڭ قولىمدا. اتالعان جەر تەلىمدەرىنىڭ باعاسى نارىقتا جۇزدەگەن ملن دوللار تۇرادى. تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ دەرەگىنە سۇيەنسەك، 2 ملن ازامات 10 سوتتىق جەردى الا الماي تەلمىرىپ ءجۇر. بۇل نەتكەن الەۋمەتتىك تەڭسىزدىك؟ كونستيتۋتسياداعى تەڭدىك پرينتسيپتەرى قايدا؟ وسىنداي جاعداي حالىقتىڭ اشۋىن تۋعىزاتىنى ءسوزسىز. مۇنداي بۇراۋدىڭ مىندەتتى تۇردە سۇراۋى بولادى»، - دەدى ەرلان سايروۆ.
ول وسى ماسەلەنى پارتيا جانىنان قۇرىلعان كەڭەس ناقتىلاۋى كەرەك ەكەنىن ايتىپ، تاپسىرما بەردى.
«كەڭەس اپپاراتىنا وسى ماسەلەمەن اينالىسۋدى تاپسىرامىن. بولات نازارباەۆپەن قاتار، تيمۋر قۇلىباەۆتىڭ دا قازاقستاننىڭ ءار جەرىندە يەمدەنىپ العان جەرلەرى بار. سونى دا تەكسەرۋ كەرەك»،- دەدى ءماجىلىس دەپۋتاتى.
