الماتىدا بۇرىنعى اكىم ۆيكتور حراپۋنوۆ زاڭسىز الىپ تاستاعان جەدەل مەديتسينالىق جاردەم كەشەنىنىڭ ءبىر بولىگى مەملەكەت مەنشىگىنە قايتارىلدى. بۇل تۋرالى پروكۋراتۋرانىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
15 اقپاندا الماتى قالاسىنىڭ مامانداندىرىلعان اۋدانارالىق ەكونوميكالىق سوتىنىڭ «جەدەل مەديتسينالىق كومەك» مۇلىكتىك كەشەنىنىڭ ءبىر بولىگىن جەكە مەنشىككە بەرۋ تۋرالى شەشىمدى جارامسىز دەپ تانۋ كۇشىنە ەندى.
«حراپۋنوۆتىڭ اۋدانى 3800 شارشى مەتر جانە 50 اكر جەر ۋچاسكەسىن (رايىمبەك داڭعىلى، 196) جەكە قۇرىلىمدارعا بەرۋ تۋرالى شەشىمىنىڭ زاڭسىزدىعى راستالدى. ناتيجەسىندە قالاداعى دەنساۋلىق ساقتاۋ نىسانى مەملەكەت مەنشىگىنە قايتارىلدى» دەپ حابارلادى قاداعالاۋ ورگانى.
ايتا كەتەيىك، ۆيكتور حراپۋنوۆ 1997-2004 جىلدار ارالىعىندا الماتى قالاسىنىڭ اكىمى قىزمەتىن اتقارعان. حراپۋنوۆ، ونىڭ ايەلى ءلايلا جانە كەيبىر تۋىستارى ىزدەۋگە جاريالاندى. 2021 جىلدىڭ قاڭتارىندا ۆيكتور حراپۋنوۆ ساياسي باسپانا الدى.
ولارعا «قىلمىستىق توپ قۇردى»، «الاياقتىق» جانە «پارا الدى» دەگەن ايىپتار تاعىلدى. بۇل رەتتە ەكس-اكىمگە «بوتەننىڭ سەنىپ تاپسىرىلعان مۇلكىن ىسىراپ ەتۋ» جانە «قىزمەتتىك وكىلەتتىكتەردى اسىرا پايدالانۋ» باپتارى بويىنشا ايىپ تاعىلدى. جالپى شىعىن 250 ميلليون دوللاردان اسادى.
