يراننىڭ سىرتقى ىستەر ءمينيسترى ابباس اراكچي ماۋسىم ايىندا اقش-تىڭ اۋە سوققىلارى كەزىندە قيراعان يادرولىق نىسانداردىڭ ءۇيىندىسىنىڭ استىندا بايىتىلعان ۋران قورى قالعانىن ايتتى، دەپ حابارلايدى "ادىرنا" ۇلتتىق پورتالى.
ءمينيستردىڭ سوزىنشە، بۇل ماتەريالداردىڭ قانداي جاعدايدا ەكەنى ازىرگە بەلگىسىز. ونى يراننىڭ اتوم ەنەرگياسى ۇيىمىنىڭ ماماندارى تەكسەرىپ جاتىر. زەرتتەۋ اياقتالعان سوڭ ارنايى بايانداما دايىندالىپ، ۇلتتىق قاۋىپسىزدىك كەڭەسىنە ۇسىنىلادى.
ساراپشىلاردىڭ پىكىرىنشە، يراننىڭ ۋران قورى جونىندەگى اشىق مالىمدەمەسى باتىسپەن كەلىسسوز جۇرگىزۋ تاكتيكاسىنىڭ ءبىر بولىگى بولۋى مۇمكىن. رەسەيلىك شىعىستانۋشى ۆلاديمير ءساجيننىڭ ايتۋىنشا، تەگەراننىڭ باستى ماقساتى – ماگاتە-مەن جانە ەۋروۇشتىكپەن (فرانتسيا، گەرمانيا، ۇلىبريتانيا) بايلانىس ورناتىپ، جاڭا سانكتسيالاردىڭ الدىن الۋ. ويتكەنى ەۋروپا ەلدەرى بۇۇ-عا يرانعا قارسى حالىقارالىق شەكتەۋلەردى قايتا ەنگىزۋ تۋرالى قۇجات تاپسىرعان.
ساراپشى يرانداعى 408 كەلى 60%-عا بايىتىلعان ۋراننىڭ كولەمى وتە كوپ ەكەنىن اتاپ ءوتتى. ونىڭ سوزىنشە، بۇل ۋراندى 90%-عا دەيىن بايىتۋ ارقىلى بىرنەشە يادرولىق زارياد جاساۋعا مۇمكىندىك بار. بۇل جاعداي جاڭا يادرولىق كەلىسىمگە كەدەرگى كەلتىرىپ وتىر.
ۆلاديمير ساجين قازىرگى احۋالدى وتە كۇردەلى دەپ باعالاپ، ەگەر يران كەلىسسوزدەردە قاتاڭ ۇستانىم تانىتسا، يزرايل اقش-پەن كەڭەسپەستەن جاڭا اۋە سوققىلارىن جاساۋى مۇمكىن ەكەنىن ايتتى.
وسى سەبەپتى تەگەران قازىر حالىقارالىق قىسىمدى ازايتۋ ءۇشىن بارىنشا ديپلوماتيالىق قادامدارعا بارىپ وتىر.
ساراپشىلاردىڭ ايتۋىنشا، الداعى ايلاردا يراننىڭ ۋران ماسەلەسى تەك تاياۋ شىعىس ەمەس، بۇكىل الەمدىك قاۋىپسىزدىك كۇن تارتىبىندەگى نەگىزگى تاقىرىپتاردىڭ بىرىنە اينالماق.
