Исламабадта АҚШ пен Иран арасындағы келіссөздер қарсаңында дипломатиялық ахуал біршама жұмсарғаны байқалады.
АҚШ Қатардағы және басқа да шетелдік банктерде бұғатталған ирандық активтерді босатуға дайын екені жөнінде белгі берген. Reuters агенттігінің мәліметінше, бұл ақпаратты жоғары лауазымды ирандық дереккөз растаған.
Тегеран бұл қадамды Вашингтонның алдағы келіссөздерге байыппен қарайтынының белгісі ретінде бағалап отыр. Келіссөздер Исламабад қаласында өтіп, негізгі тақырыптардың бірі Ормуз бұғазы арқылы қауіпсіз навигацияны қамтамасыз ету мәселесі болмақ.
Дегенмен, АҚШ тарапынан активтерді босату туралы ресми мәлімдеме жасалған жоқ. Екінші ирандық дереккөздің айтуынша, сөз болып отырған қаражат көлемі шамамен 6 миллиард долларды құрайды. Бұл қаражат 2023 жылы Доха қаласының делдалдығымен жүзеге асқан тұтқындар алмасу келісімі аясында Қатар банктеріне аударылған.
Аталған қаржы бастапқыда Иранның Оңтүстік Корея еліне мұнай сатудан түскен. Алайда 2018 жылы Дональд Трамп әкімшілігі санкцияларды қайта енгізгеннен кейін бұғатталған болатын. Кейінірек, 2023 жылы АҚШ бұл қаражатты тек гуманитарлық мақсаттарға — азық-түлік, дәрі-дәрмек және медициналық құрал-жабдықтар сатып алуға пайдалануға ішінара рұқсат берген.
Бірақ 2023 жылғы 7 қазандағы ХАМАС ұйымының Израильге жасаған шабуылынан кейін Вашингтон бұл қаражатқа қолжетімділікті қайта шектеді.
Соңғы күндері Иранның IRGC құрылымымен байланысты ақпарат көздері АҚШ активтерді босатуға рұқсат берді деп хабарлағанымен, америкалық шенеуніктер бұл мәліметті жоққа шығарды. CBS News телеарнасына берген түсініктемеде АҚШ мұндай шешім қабылдамағанын мәлімдеді.
Айта кетейік, аймақтағы шиеленісті дипломатиялық жолмен шешуге бағытталған әрекеттер жалғасуда. Дональд Трамп Иранға қарсы соққыларды уақытша тоқтатуға дайын екенін білдіргеннен кейін, ресми Тегеран екі апталық бітім шарттарын қабылдаған. Осыған байланысты тараптар арасында атысты тоқтату жөніндегі келіссөздер Исламабадта өтпек.
