رەسەي جوعارى سوتى جابىق رەجيمدە «حالىقارالىق „مەموريال“ قوعامىن "ەكسترەميستىك ۇيىم" دەپ تانىپ، ەل اۋماعىندا ونىڭ قىزمەتىنە تىيىم سالدى، دەپ حابارلايدى "ادىرنا" ۇلتتىق پورتالى.
بۇل قوزعالىس رەسمي تۇردە تىركەلمەگەن، ال سوت شەشىمى نەگىزىنەن 2022 جىلى جويىلعان قۇرىلىمداردىڭ ورنىنا قۇرىلعان قۇقىق قورعاۋ ۇيىمدارى مەن ولارمەن ىنتىماقتاستىقتا جۇرگەندەردى نىساناعا الادى.
شەشىم رەسەي فەدەراتسياسىنىڭ ادىلەت مينيسترلىگى ءوتىنىشى بويىنشا قابىلداندى. سوت سايتىندا ناقتى كىمگە جانە نە ءۇشىن شاعىم بەرىلگەنى كورسەتىلمەگەن. الايدا ءباسپاسوز قىزمەتى قوزعالىستى ەكسترەميستىك دەپ تانۋدى ماقسات ەتكەنىن حابارلادى.
سوت ءىسى ءبىرىنشى ينستانتسيادا قارالدى. بىراق ەكسترەميستىك دەپ تانىلعان ۇيىمعا تىيىم زاڭ بويىنشا دەرەۋ كۇشىنە ەنەدى. ال سوت شەشىمىنە شاعىم بەرەتىندەرگە قاتىستى جاۋاپكەرشىلىك اپەللياتسيادان كەيىن، مينيسترلىك جاڭا دەرەكتەردى تىيىم سالىنعان ۇيىمدار رەەسترىنە ەنگىزگەننەن كەيىن عانا باستالادى.
الايدا، اتالمىش قوزعالىس رەسمي تۇردە تىركەلمەگەن ءارى رەسەيدە دە، باسقا ەلدەردە دە زاڭدى تۇلعا رەتىندە جوق.
ء«ىس „وتە قۇپيا“ مارتەبەسىندە قارالىپ جاتىر، ءبىز سوت جانە ادىلەت مينيسترلىگىنىڭ «حالىقارالىق مەموريال قوزعالىسىنا» كىمدەردى جاتقىزاتىنىن نەمەسە ايىپتاردىڭ ناقتى مازمۇنىن بىلمەيمىز»، — دەيدى ناتاليا سەكرەتارەۆا، "مەموريال" قۇقىق قورعاۋ ورتالىعىنىڭ زاڭ ءبولىمى جەتەكشىسى.
حالىقارالىق تاريحي، ءبىلىم بەرۋ، ادام قۇقىقتارى جانە قايىرىمدىلىق باعىتىندا جۇمىس ىستەيتىن «مەموريال» قوعامى - كسرو-داعى ساياسي قۋعىن-سۇرگىندەردى زەرتتەۋ ءۇشىن قۇرىلعان ۇكىمەتتىك ەمەس ۇيىم. 1992 جىلى ماسكەۋدە قۇرىلعان. ونىڭ الدىندا 1987 جىلى پايدا بولىپ، بىرنەشە ايماقتىق ۇيىمدار مەن توپتاردىڭ پايدا بولۋىنا سەبەپ بولعان ماسكەۋلىك «مەموريال» قوعامدىق توبى جۇمىس ىستەدى. 1989 جىلى ولار بىرىگىپ، بۇكىلوداقتىق «مەموريال» تاريحي-اعارتۋ قوعامىن قۇردى.
كەيىن حالىقارالىق ۇيىمعا اينالعان "مەموريال" قوعامى رەسەي، گەرمانيا، قازاقستان، يتاليا، چەحيا، بەلگيا، فرانتسيا جانە ۋكرايناداعى ون ەكى ۇيىمنىڭ سەرىكتەستىگى بولىپ تابىلادى. قوعام زەرتتەۋلەر جۇرگىزەدى، ادام قۇقىقتارىن قورعاۋ جانە اعارتۋ ىستەرىمەن اينالىسادى.
