ەۋرازيالىق ەكونوميكالىق وداق اياسىندا مۇشە ەلدىڭ ۇيىمنان شىعۋى نەمەسە مۇشەلىگىن توقتاتۋ ازىرگە قاراستىرىلماعان، دەپ حابارلايدى "ادىرنا" ۇلتتىق پورتالى.
بۇل تۋرالى رف ۆيتسە-پرەمەرى الەكسەي وۆەرچۋك مالىمدەدى.
ونىڭ ايتۋىنشا، قازىرگى ۋاقىتتا مۇنداي قۇقىقتىق مەحانيزمدەر ەاەو تۋرالى شارتتا جوق، سوندىقتان «مۇشەلىكتى توقتاتۋ» نەمەسە «شىعارۋ» سياقتى تەتىكتەردى جان-جاقتى قۇقىقتىق تۇرعىدان زەرتتەۋ قاجەت.
ء«بىز توقتاتا تۇرۋ نە بىلدىرەتىنىن زەرتتەيمىز. قازىرگى شارتتا مۇشەلىكتى توقتاتۋ نەمەسە شىعارۋ رەجيمى قاراستىرىلماعان. سوندىقتان بۇل ماسەلە قۇقىقتىق تۇرعىدان مۇقيات قارالۋى ءتيىس، جەلتوقسانعا دەيىن پىسىقتايمىز»، – دەدى وۆەرچۋك.
بۇعان دەيىن، 29 مامىردا استانادا وتكەن جوعارى ەۋرازيالىق ەكونوميكالىق كەڭەس وتىرىسىندا بەلارۋس، قازاقستان، قىرعىزستان جانە رەسەي پرەزيدەنتتەرى ارمەنيانىڭ ەاەو-داعى مۇشەلىگى ماسەلەسىن كەلەسى وتىرىستا قايتا قاراۋ تۋرالى بىرلەسكەن مالىمدەمە قابىلداعان.
