ازەربايجان سىرتقى ىستەر مينيسترلىگى رەسەي فەدەراتسياسىنىڭ ەلشىسى ميحايل ەۆدوكيموۆتى شاقىرىپ، رەسەيلىك تاراپتىڭ دوستىققا جات ارەكەتتەرىنە بايلانىستى رەسمي نارازىلىق ءبىلدىردى، دەپ حابارلايدى" ادىرنا" ۇلتتىق پورتالى.
بۇل تۋرالى ازەربايجان ءسىم رەسمي حابارلادى.
كەزدەسۋدى ازەربايجان سىرتقى ىستەر ءمينيسترىنىڭ ورىنباسارى اراز ازيموۆ وتكىزدى. ازەربايجان تاراپى ەكاتەرينبۋرگ قالاسىندا 27 ماۋسىمدا بولعان وقيعاعا بايلانىستى الاڭداۋشىلىعىن ءبىلدىردى. سول وقيعا كەزىندە رەسەيلىك كۇش قۇرىلىمدارىنىڭ زاڭسىز ارەكەتتەرىنەن ەكى ازەربايجان ازاماتى قازا تاۋىپ، بىرنەشە ادام اۋىر جاراقات العان.
ءسىم وكىلدەرىنىڭ ايتۋىنشا، رەسەيلىك تاراپتىڭ قازا بولعان سافاروۆ باۋىرلارىنا قاتىستى مالىمدەمەلەرى ازەربايجاندا جۇرگىزىلگەن تاۋەلسىز ساراپتاما ناتيجەلەرىمەن سايكەس كەلمەيدى. ساراپتاما بارىسىندا مارقۇمداردىڭ دەنەسىندە زورلىق-زومبىلىقتىڭ ايقىن بەلگىلەرى انىقتالعان.
ازەربايجان رەسەيلىك باق-تا ازەربايجاندىقتارعا قاتىستى «ەتنيكالىق قىلمىستىق توپ» دەگەن سەكىلدى كەمسىتۋشىلىك سيپاتتاعى سوزدەردى قولدانۋدىڭ جول بەرىلمەيتىنىن دە اتاپ ءوتتى.
سونىمەن قاتار، ەلشى ەۆدوكيموۆقا «Sputnik-ازەربايجان» اگەنتتىگى كەڭسەسىندە جۇرگىزىلگەن قۇقىق قورعاۋ وپەراتسياسىنا قاتىستى رەسەيدىڭ نارازىلىعى نەگىزسىز ەكەنى ءتۇسىندىرىلدى.
كەزدەسۋدە بىلتىر جەلتوقساندا رەسەي اۋە كەڭىستىگىندە بولعان AZAL جولاۋشىلار ۇشاعىنىڭ اپاتى دا ءسوز بولدى. ازەربايجان تاراپى رەسەيدىڭ ءتيىستى ارەكەت جاساماۋىن جانە رەسەيلىك باق پەن شەنەۋنىكتەر تاراپىنان فاكتىلەردىڭ بۇرمالانۋىن سىنعا الدى. ازەربايجان رەسەيدەن ۇشاق اپاتىنا قاتىستى تولىققاندى، اشىق تەرگەۋ جۇرگىزۋدى، كىنالىلەردى جاۋاپقا تارتۋدى جانە زارداپ شەككەندەرگە وتەماقى تولەۋدى تالاپ ەتۋدە.
ازەربايجان سوڭعى 4-5 ايدا رەسەيلىك ساياساتكەرلەر مەن باق وكىلدەرىنىڭ ازەربايجاننىڭ ەگەمەندىگى مەن اۋماقتىق تۇتاستىعىنا قارسى ايتقان سوزدەرى ەكى ەل اراسىنداعى قارىم-قاتىناستارعا كەرى اسەر ەتكەنىن مالىمدەدى.
ازەربايجان رەسەيلىك تاراپتى ەكىجاقتى قاتىناستارداعى شيەلەنىستى ازايتىپ، قالىپتى ديپلوماتيالىق ىنتىماقتاستىقتى قالپىنا كەلتىرۋ ءۇشىن ناقتى شارالار قابىلداۋعا شاقىردى.
