اقتوبە وبلىسىندا شەنەۋنىكتەر ابىلقايىر حان تۋرالى كىتاپتى اۆتورلىق قۇقىقتى بۇزا وتىرىپ شىعارعان دەپ ايىپتالدى، دەپ حابارلايدى "ادىرنا" ۇلتتىق پورتالى.
كىتاپ ەكى جىل بۇرىن جارىق كورگەن. «ابىلقايىر حان: قولباسشى، ساياساتكەر» اتتى قازاق تىلىندەگى مونوگرافيا وقىرماندار تاراپىنان وڭ باعالانعانىمەن، ابىلقايىر حان حالىقارالىق قورى مەن «دايك-پرەسس» باسپاسى سوتقا جۇگىنگەن.
ءىس ماتەريالدارىنا سايكەس، شامامەن 20 جىل بۇرىن «دايك-پرەسس» باسپاسى قازاقستاندىق تاريحشى يرينا ەروفەەۆانىڭ «حان ابۋلحاير: پولكوۆودەتس، پراۆيتەل، پوليتيك» اتتى ورىس تىلىندەگى ەڭبەگىن شىعارعان. اۆتور سول كەزدە بۇل ەڭبەككە قاتىستى ايرىقشا مۇلىكتىك قۇقىقتاردى حالىقارالىق قورعا جانە باسپاعا رەسمي تۇردە بەرگەن. الايدا قازاق تىلىندەگى نۇسقاسىن شىعارۋ بارىسىندا ولاردىڭ كەلىسىمى الىنباعان.
سوتتا بەلگىلى بولعانداي، كىتاپتى قازاق تىلىنە اۋدارۋ باستاماسىن جەرگىلىكتى بەلسەندى كوتەرگەن. ال اكىمدىك بۇل ۇسىنىستى قولداپ، قارجىلاندىرۋ ءۇشىن «پارىز» قوعامدىق قورىن تارتقان.
جاۋاپكەرلەر وزدەرىنە تاعىلعان ايىپتى مويىنداماعان. ال باستاماشى، اۋدارماشى جۇمىستىڭ ماقساتى ابىلقايىر حاننىڭ مۇراسىن ناسيحاتتاۋ بولعانىن، كوممەرتسيالىق پايدا كوزدەلمەگەنىن العا تارتقان.
سوت ءىستى قاراۋ ناتيجەسىندە تالاپ ارىزدى ءىشىنارا قاناعاتتاندىردى. قازاق تىلىندەگى مونوگرافيانى شىعارۋ زاڭسىز دەپ تانىلىپ، جاۋاپكەرلەرگە اۆتورلىق قۇقىقتىڭ بۇزىلعانى تۋرالى اقپاراتتى بۇقارالىق اقپارات قۇرالدارىندا جاريالاۋ مىندەتتەلدى.
الايدا تالاپكەرلەردىڭ كىتاپتى اينالىمنان تولىق الىپ تاستاۋ تۋرالى تالابى ورىندالمادى. سوت بارىسىندا 1000 دانا كىتاپتىڭ ناقتى قايدا ەكەنى انىقتالماعاندىقتان، بۇل تالاپتى ورىنداۋ مۇمكىن بولماعان.
قازىرگى ۋاقىتتا جاۋاپكەرلەردىڭ سوت شەشىمىنە شاعىمدانۋعا مۇمكىندىگى بار
