Aqtöbe oblysynda şeneunıkter Äbılqaiyr han turaly kıtapty avtorlyq qūqyqty būza otyryp şyǧarǧan dep aiyptaldy, dep habarlaidy "Adyrna" ūlttyq portaly.
Kıtap ekı jyl būryn jaryq körgen. «Äbılqaiyr han: qolbasşy, saiasatker» atty qazaq tılındegı monografiia oqyrmandar tarapynan oŋ baǧalanǧanymen, Äbılqaiyr han halyqaralyq qory men «Daik-Press» baspasy sotqa jügıngen.
Is materialdaryna säikes, şamamen 20 jyl būryn «Daik-Press» baspasy qazaqstandyq tarihşy İrina Erofeevanyŋ «Han Abulhair: polkovodes, pravitel, politik» atty orys tılındegı eŋbegın şyǧarǧan. Avtor sol kezde būl eŋbekke qatysty airyqşa mülıktık qūqyqtardy halyqaralyq qorǧa jäne baspaǧa resmi türde bergen. Alaida qazaq tılındegı nūsqasyn şyǧaru barysynda olardyŋ kelısımı alynbaǧan.
Sotta belgılı bolǧandai, kıtapty qazaq tılıne audaru bastamasyn jergılıktı belsendı kötergen. Al äkımdık būl ūsynysty qoldap, qarjylandyru üşın «Paryz» qoǧamdyq qoryn tartqan.
Jauapkerler özderıne taǧylǧan aiypty moiyndamaǧan. Al bastamaşy, audarmaşy jūmystyŋ maqsaty Äbılqaiyr hannyŋ mūrasyn nasihattau bolǧanyn, kommersiialyq paida közdelmegenın alǧa tartqan.
Sot ıstı qarau nätijesınde talap aryzdy ışınara qanaǧattandyrdy. Qazaq tılındegı monografiiany şyǧaru zaŋsyz dep tanylyp, jauapkerlerge avtorlyq qūqyqtyŋ būzylǧany turaly aqparatty būqaralyq aqparat qūraldarynda jariialau mındetteldı.
Alaida talapkerlerdıŋ kıtapty ainalymnan tolyq alyp tastau turaly talaby oryndalmady. Sot barysynda 1000 dana kıtaptyŋ naqty qaida ekenı anyqtalmaǧandyqtan, būl talapty oryndau mümkın bolmaǧan.
Qazırgı uaqytta jauapkerlerdıŋ sot şeşımıne şaǧymdanuǧa mümkındıgı bar
