18–19 شىلدە كۇندەرى استانادا «التىن وردانىڭ مۇراسى: ۇلى دالادان باستاۋ العان ونەر» اتتى ۇلىتاۋ وبلىسى ۇيىمداستىرعان كورمە ءوتىپ جاتىر. ءىس-شارا قازاقستاننىڭ كرەاتيۆتى يندۋستريالارىن دامىتۋعا جانە ۇلى دالانىڭ تاريحي-مادەني مۇراسىن كەڭىنەن ناسيحاتتاۋعا باعىتتالعان.
ۇلىتاۋ وبلىسى ۇيىمداستىرعان كورمە اياسىندا قازاق حالقىنىڭ باي مادەني مۇراسىنىڭ زاماناۋي ديزاين، ءسان يندۋسترياسى، زەرگەرلىك ونەر، كەسكىندەمە جانە اۆتورلىق قولونەردەگى جاڭا كورىنىسى ۇسىنىلعان. كەلۋشىلەر قازاقستان تاريحى مەن التىن وردا مادەنيەتىنەن شابىت العان زاماناۋي سۋۆەنيرلىك ونىمدەردى، اعاشتان، بىلعارىدان، كەراميكا مەن كيىزدەن جاسالعان قولونەر بۇيىمدارىن، زەرگەرلىك اشەكەيلەردى، سۋرەتشىلەردىڭ تۋىندىلارىن، ەتنو-ءسان توپتامالارىن جانە قازاقتىڭ ءداستۇرلى قۇراق كورپە ونەرىنە ارنالعان ارنايى ەكسپوزيتسيانى تاماشالاپ جاتىر.
ءىس-شارا بارىسىندا ۇلىتاۋدان كەلگەن شەبەرلەرمەن بىلعارى وڭدەۋ، اعاش ويۋ، ۇلتتىق مۋزىكالىق اسپاپتار جاساۋ جانە ۇستالىق ونەر بويىنشا شەبەرلىك ساباقتارى ۇيىمداستىرىلۋدا. سونىمەن قاتار قولونەرشىلەرمەن، سۋرەتشىلەرمەن جانە ديزاينەرلەرمەن شىعارماشىلىق كەزدەسۋلەر ءوتىپ، ۇلتتىق ونەردىڭ بۇگىنگى دامۋ باعىتتارى تانىستىرىلىپ جاتىر. كورمەنىڭ كونتسەرتتىك باعدارلاماسى اياسىندا قازاقستاندىق ديزاينەرلەردىڭ Ethno Fashion Showء سان كورسەتىلىمى ۇسىنىلادى. سونداي-اق كەشكى باعدارلاما Jezz Acoustic Band توبىنىڭ كونتسەرتىمەن جالعاسادى. ۇيىمداستىرۋشىلاردىڭ ايتۋىنشا، جوبا وتاندىق قولونەرشىلەردى، ديزاينەرلەردى، سۋرەتشىلەردى جانە شىعارماشىلىق كاسىپكەرلەردى قولداۋعا، سونداي-اق Made in Kazakhstan ۇلتتىق برەندىن دامىتۋعا باعىتتالعان.
كورمە استانا قالاسى، حوشى حان كوشەسى، 16/2 مەكەنجايىنداعى Qazaq Creative Hub الاڭىندا ءوتىپ جاتىر.
