ەلىمىزدەگى مەكتەپتەردىڭ بىرىندە مۇعالىمنىڭ وقۋشىلارعا ءدىني ساباق وتكىزگەنى تۋرالى ۆيدەو قالىڭ كوپشىلىكتى دۇرلىكتىرگەن ەدى. الەۋمەتتىك جەلىدە كەڭىنەن تاراعان ۆيدەو قاي جەردە، كىمنىڭ تاراپىنان تۇسىرىلگەنى بەلگىلى بولدى. مەكتەپ اكىمشىلىگى شەتىن جايعا قاتىستى تۇسىنىكتەمە بەرىلدى. بۇل جايلى "ادىرنا" ۇلتتىق پورتالى حابارلادى.
"Sputnik قازاقستان"-نىڭ حابارلاۋىنشا، بالالارعا اراب مادەنيەتىنە نەگىزدەلگەن ۇگىت-ناسيحات جۇرگىزىلگەن ءدارىستىڭ ۆيدەوسىن الماتىداعى №176 مەكتەپ-گيمنازياسىنىڭ باستاۋىش سىنىپ مۇعالىمى تۇسىرگەن. كەيىن ۆيدەونى WhatsApp مەسسەندجەرى ارقىلى اتا-انالار چاتىنا جولداعان. اقىرىندا، مۇعالىمنىڭ ۆيدەوسى جەلىنى شارلاپ، قوعامنىڭ نازارىن اۋداردى. WhatsApp قولدانۋشىلارى دا ونى وڭدى-سولدى تاراتقان.
الماتى قالالىق ءبىلىم باسقارماسى مۇعالىمنىڭ بۇل مەكتەپتە 2009 جىلدان بەرى قىزمەت ەتىپ كەلگەنىن ايتىپ وتىر.
"مۇعالىمنىڭ ايتۋىنشا، بۇل ءدىني تاقىرىپتى ساباق باستالماي تۇرىپ، 15 مينۋت بۇرىن وتكىزگەن. كەيىن WhatsApp مەسسەندجەرىندەگى اتا-انالار چاتىنا جۇكتەگەن جانە ءوز ستاتۋسىنا سالعان. مۇنداي جاعداي ءبىر رەت قانا تىركەلگەن. وسى جاعدايعا بايلانىستى ءبىلىم باسقارماسى تاراپىنان كوميسسيا قۇرىلىپ، مۇعالىممەن ءتۇسىندىرۋ جۇمىستارى جۇرگىزىلدى", - دەيدى باسقارما ماماندارى.
بۇگىنگى كۇنى بالالارعا ءدىني ۇگىت-ناسيحات جۇرگىزگەن مۇعالىپ ءوز ەركىمەن جۇمىستان شىقتى. مەكتەپ اكىمشىلىگى دە جاۋاپقا تارتىلدى. سونىمەن قاتار، باسقارما قازاق ەلىنىڭ زايىرلى مەملەكەت ەكەندىگىن ەرەشك ەسكە سالىپ، مەكتەپتەردە سوعان ساي ءبىلىم بەرىلۋى ءتيىس ەكەندىگىن اتاپ ءوتتى.
ء"بىلىم بەرۋ ۇيىمدارىندا مۇعالىمدەر تەك مەملەكەتتىك ءبىلىم بەرۋ ستاندارتى مەن بەكىتىلگەن باعدارلامالار اياسىندا عانا ساباق وتكىزۋگە مىندەتتى. وقۋ ورىندارىنىڭ قابىرعالارىندا قانداي دا ءبىر باسقا ءىس-شارالاردى وتكىزۋگە تىيىم سالىنادى", - دەپ اتاپ ءوتتى ماماندار.
"ادىرنا" ۇلتتىق پورتالى
